Nongstoiñ, Jylliew, 21: Namar la jing jur palat jong u slap ha kine ki taïew ba la dep, ka la don ka jingtwa khyndew ha bun tylli ki jaka ha shilynter ka surok bah National Highway 44 (E) Shillong Tura. Ha West Khasi Hills ka jingtwa khyndew ka dei ha ki katto katne ki jaka naduh Khenkba ter ter haduh ki thaiñ Umdang, hynrei ka jinghap khyndew kam da jur palat bad kam shym la don ka jingpynthut ïa ka leit ka wan.
Ha kaba ïadei bad ka jingtwa khyndew ha shilynter ka surok NH 44 (E), na ka liang ka tnad PWD Nongstoiñ Division, mar shu ïoh jingtip ka la phah wut wut ïa ki Kontraktor ba kin phah pynkhuid bad lada jia ba kan dang don biang ka jingtwa khyndew, ka PWD kan shimkhia ban phah pynkhuid khnang ba kan ym don ka jingpynthut ïa ka leit ka wan jong ki paitbah.
Nalor kata na ka liang ki bor pynïaid District ki la kyntu ïa baroh ki nongñaiah kali ha shilynter ka NH 44 (E), ba ha ka por ba ki ñiah ïa kali lada ki ïohi ba ki don kino kino ki dak kiba pyni ba ka don ka jingtwa khyndew, ki dei ban da phikir bad peit bniah, namar lada jia ba ka khyndew ka hap kynsan ha pyrshah ba ka kali ka don ka lah ban wan rah ïa ka jingmynsaw.
