Jur ka jingtwa khyndew bun jaka ha surokbah NH-6 Narpuh, sahkut ki kali ha ka ktieh

Khliehriat, Jylliew, 01: Ka jingther jong u slap uba jur uba la neh mynta la palat saw sngi kynthih, ka la wanrah ïa ka jingtwa khyndew ha kiba bun ki jaka ha ka thaiñ Narpuh, East Jaiñtia Hills District. Ki kali kiba ïaid lyngba na surokbah National Highway-6 ki la sahkut ha ka dheng kali kaba jur namar ka khyndew ktieh, ki maw bad ki dieng bad ka um ktieh ki la satah hapdeng jong ka surok.
Nalor kata ha ka thaiñ Narpuh ka surok ka dang sniew bha bad ka la buh jingeh wat ha ka por ba rang ruh. Kane ka jingtwa khyndew ka la nang wanrah shuh shuh ka jingjyrsieh kaba jur bha ha surokbah NH-6 bad kaba la buh jingma ïa ki nongñiah kali bad ki nongleit jingleit.
Katkum ka jingïoh jingtip, ha ka sngi Saitjaiñ jong ka taiew balade ka la don ka jingtwa khyndew ha ka thaiñ Ratacherra ha Dona bad ha kiwei kiwei ki jaka bad ha ka sngi U Blei ruh ka la jia biang ka jingtwa khyndew ha Dona Umbluh, ha Ratacherra, ha Kuliang bad ha kiba bun ki jaka.
Kawei ka ïing trep ka la julor na ka jingtwa jong ka khyndew kaba la jia ha Ratacherra ha ka sngi U Blei tangba kam shym la don kano kano ka jingjia ba sngewsih namarba ym don satia ki briew ki bashong basah shong ha ka ïing trep.
Kiba bun ki kali ki la sahkut ha ka jyrsieh namar ka jingrben jong ka khyndew ktieh ka la long shaba palat bad ka um ktieh ruh ka la tuid pathar nalor ki lum sha surok.
Ki nongtrei jong ka National Highway Authority of India (NHAI) khlem shong thait ki la trei shitom ha kaba ki dang ïakhun haduh mynta ban pynkhuid ïa ka khyndew, ïa ki maw, ïa ki dieng kiba wit bad khang ïa surok NH-6 ha ka thaiñ Narpuh.
Ki don ki jaka kiba la lah ban pynkhuid bad ki kali ki la lah ban ïaid bad ki dang ruh ki jaka ba ki nongtrei ka NHAI ki dang ïakhun ban pynkhuid ïa ka khyndew, ïa ki maw, ki dieng kiba la hap hapdeng jong ha surok.