Nongpoh, Nohprah 18: Ka jingtih maw bad tih khyndew beaiñ ha Rani, kawei na ka shnong khappud ka jylla Meghalaya kaba don ha syndah ka Assam ba hap ha ka Jirang C&RD Block ha Ri Bhoi District ka la wan rah ym tang ka jingduhnong kaba khraw ban jingpynjot pathar ïa ki khlaw ki btap bad ki marpoh khyndew ka jylla, hynrei ka jingbym lah ban tehlakam da ki bor ba dei peit ka sorkar ka la wan rah ruh ka jingduhnong kaba khraw ha kaba ïa dei bad ka Khajna sorkar.
Kumba la ioh lum jingtip, ha kane ka shnong khappud ka Meghalaya ba la tip kum ka Shnong Rani Jirang ym tang kata ka jingtih maw tih khyndew beain ba la shim kabu da ki heh spah na Assam, hynrei ki heh spah na Assam ki wan ruh ban buh beain ruh wat ïa ki kot tylliat maw (Stone Crusher) ban tylliat ïa ki maw kiba ki la tih beaiñ na ki khlaw kiba don ha kane ka shnong Rani ha ka thaiñ Jirang ha Ri Bhoi District.
La ioh lum jingtip ruh ba kitei ki kor tylliat maw bad ki jingtihmaw na ki lum ba don ki khlaw ki dei kiba ym pat ioh bor na ka sorkar jylla bad kitei ki heh spah ki ju trei tang ha ka por mynmiet bad na ka daw ka jingbym shim khia ki bor ba dei peit ki la sdang ruh ban trei ïa kitei ki kam kamai beaiñ wat ha ka por mynsngi mynshai.
Kaei kaba shah ktah bha ïa ka jylla, nalor ba kitei ki heh spah na Assam ki wan ban tih maw bad buh da ka kor tylliat maw beaiñ kaba khlem da ioh bor na ka sorkar jylla bad ïa kitei ki maw bad ki mawria ruh la shalan beaiñ sha Assam khlem kano kano ka khyrdop khrong khajna ka sorkar, ha kaba kane ka la wan rah ka jingduhnong ïa ka sorkar ha ka liang ka Khajna. Ban pynduhjaid ïa kine ki jingtih bad tylliat maw beaiñ la donkam ban tuklar noh da ki bor ba kham halor ka sorkar bad lada ym don kata ka jingshim khia na ka liang ki bor ba kham halor kane ka jingtih maw ba tylliat maw kan dang bteng bad kaei kaba ka jylla ka mad ka dei tang ka jingpynjot ïa ki khlaw ki btap bad ruh ka jingduhnong ha ka liang ka khajna, ong ka khubor ba la ioh lum da u Nongthoh Khubor.
