Nongpoh, Jylliew 23: Ka jingtih khyndew beaiñ haka thaiñ khappud jong ka Meghalaya bad Assam kala nang jur katba nangmih ki sngi naduh ka thaiñ Jorabad, Killing, Khanapara mynta bun bun snem bad katei ka jingtih khyndew kala wanrah jingeh pynban ïaki nongleit nongwan khamtam haka por slap namar ka khyndew bad ki maw ki tuid sha surok, kaba dei ruh kawei naki daw ka jingshlei um haki bun jaka namar bun naki nala bad ki jaka ba ka um ka ioh ban tuid la dap bad set da ka khyndew.
La sakhi ruh mynta ka sngi kala don ka jingtuid bad ka hap ka khyndew haka thaiñ 10 mer, ha kaba ka khyndew na jrong lum kala sdang ban tuid sha surok bad ym lah ban tip satia ha kano ka por ba utei u lum u lah ban twa namar ka jinghap slap bad jem ka khyndew.
Katto katne ki paidbah kila ong ruh ba katei ka jingtuid jong ka khyndew ha katei ka jaka kala neh bun kynta kaba lah ruh ban wanrah jingma ha kano kano ka por ïaki nongleit nongwan naka jingtwa khyndew kaba lah ruh ban wanrah ki jingjia ba sngewsih.
La ong ruh ba haduh mynta ka jingtih khyndew ha katei ka thaiñ ka jur bha ha kaba kam don kano kano ka jingtehpyrkhing naka liang ki bor district ban khanglad ïaka jingtih khyndew beaiñ ha katei ka thaiñ, ha kaba ki nongtih khyndew ki ioh mon ban pynpra ïaki lum ban shalan ïaka khyndew tang naka bynta ka jingmyntoi shimet.
