Jowai, Jylliew 15: Ka Khooid Ya Ka Wah Myntdu ka pynpaw ïa ka jingsngewsih bad ka pyrshah ïa ka M/s Dhar Construction Company kumjuh ïa ka office u Executive engineer PWD (Rds) Jowai Central Division, Jowai kaba la ai mon ailad ïa katei ka Conpanyr kaba shna pynheh ïa utei u surok Dawki Amlarem Jowai bad noh pyntuid biang ïa ka khyndew na kaba hap ba ur sha ka wah Myntdu katba ka sngewbiang sngewmon khamtam ha ki bynta kiba khot ka Dam ser ha wah Myntdu.
U President ka seng ula ïathuh ba kane ka rukom trei kane ka Construction Company ka la ktah bha ïa kiba leit ba wan naduh ki khynnah school, kiba trei bylla kiba shong die ha ïew ha Jowai kiba wan na ki shnong na war Jaiñtia.
Naduh une u snem ba jur u slap la lap la bunsien ba ur katei ka khyndew hadien ba la dep shna pynheh ïa ka surok, ha kaba na ka liang jong ka KYWM ka la dep ban ujor la bunsien ha u EE ka PWD (Rds) Jowai Central Division bad kumjuh ha u Junior Engineer (JE) ba peit ban bha katei ka jingtrei ha utei u surok, pyrshah ïa katei ka jingpyntuid ïa katei ka Khyndew ba ur sha ka wah Myntdu, la lap bunsien ba tang kawei ka JCB ba lur ba pyntuid ïa katei ka Khyndew sha ka lyngkha ban tuid sha wah Myntdu, ka Contractor kam ju pynkit ïa katei ka Khyndew da ki truck dumper sha kata ka jaka bret khyndew jong ka M/s DCC.
Na kane ka jingleh beaiñ ka M/s DCC bad ka jingailad katei ka office ka da ktah jur bha ïa ka Wah Myntdu khamtam ïa ka Mupiah ka jaka pynlang (reservoir dam) Um ka office u EE PHE (Elect) Jowai, kaba sam um sha ki ïing ha Jowai.
La ïathuh ba katei ka jaka pyllang um, ka la shah pyndap da ka khyndew, da u shyiap, kaba la buh ïa ki nongtrei ka office PHE ha ka jingeh ban lah ban pynkhuid ïa ka Um na katei ka wah Myntdu, wat haduh mynta kiba bun ki longïing kiba shañiah Um na PHE ki a shitom ban ïoh um da kaba khuid ban pyndonkam ha ka por ba hiar u slap na ka daw ba ka la jngut bad kumjuh hadien ba la rang u slap ka la duna ka jingpynpoi Um na ka daw ba la dap khyndew katei ka Mupiah ka jaka pyllang um ka PHE.
Ka Khyndew ba la pyntuid sha Myntdu, ka la ktah jur ruh ïa ka Pynthor kba kaba sharum (Syntu ksiar bad shaduh sha shnong Ïalong) ha kaba ka la pynjngut da ka khyndew saw bad u shyiap naba pyntuid na katei ka jingnoh khyndew na katei ka surok.
Kiba pli ki nongrep bad ki trai lyngkha ki la ïam la paid u dohnud na ka daw ba la pyndap khyndew ki lyngkha bad la artatien ban ïoh Kba ïoh khaw ha une u snem naba la pyndap sa u shyiap ïa ki lyngkha ki jong ki.
Kane ka jingbym treikam jong ki tnat ka sorkar khamtam ka PWD (Rds) bad u Deputy Commissioner WJHD halor katei ka jinglehbeaiñ ïa ka wah Myntdu watla ka seng kala dep ujor la bunsien, hynrei ki hun ban peit tang da ki khmat, kim nud ban pynshitom ïa katei ka jingleh beaiñ ka jinglehbeiñ ïa ka Myntdu ka tawiar waroh kawei. Ong shuh shuh ka seng.
Mynta ka sngi ka KYM ka buh ïa ka jingkyrpad bad kyntu jur ïa baroh ki nongshong shnong tawiar ka Myntdu khamtam kiba ha Jowai, ba ki dei ban ïeng ïaleh pyrshah kum ïa kane ka jingleh khiar bad kam beaiñ kaba la ktah ïa ka jingim, ha kaba lada ym ïeng ïaleh ban pynduh naduh mynta.
Lada kane kan ïai jia kumne ka wah Myntdu kaba ai um, kaba pyndap ïa u Kba u Khaw, haduh ki doh um kin sa duh kin sa dam noh, bad ka pateng kan sa mad ki jingjynjar, namar la sakhi mynta, ba ka wah Myntdu kala nang shah pyndap lypa da u shyiap ka Khyndew. Pynkut ka kyrwoh na u President ka KYWM ma Khroo L Pariat.
