Nongstoiñ, Jymmang, 7: Watla na ka liang u District Magistrate ka West Khasi Hills District, u la dep u la pynjari da ka 144 Crpc ba la khang pyrshah ïa ka jingpom pathar ïa ki ki dieng ban thang rnga, namar ka ktah ia ka mariang. Hynrei imat ki paidbah kim patiaw ei ei ïa kane ka jingpynmih hukum bad la lap kylleng ki jaka ba ka jingthang rnga ka dang iai beit shakhmat kumba long baroh shikatta.
Ha ka jingjurip jong u nongthoh khubor ha kylleng ki jaka, la lap ba ka jingthng rnga bad ka jingpom pathar ïa ki dieng ka dang kynrei bha bad dang lap ruh ba ki trok kit rnga ki dang don da ki phew tylli man ki jaka bad ïaid sahuh man ka miet khlem jingsalia. Nalor nangta ka kam shalan dewiong ruh ha kane ka tlang ba la dep ka pjah slam slam bha bad imat dei na kane ka daw ba ka kam thang bad shalan rnga ka iaid kam bha.
Ha kine ki sngi ba la dep la lap ba ha ki thaiñ rimen bad kiwei kiwei ki jaka jong ka West Khasi Hills, ka jingthang rnga ka jur haduh katta katta bad ha ka por mynmiet lei lei, ka tdem kaba mih na ki thliew rnga ka tap lup haduh ba lada ki kali kiba ïaid bun ba kim imat shuh wat lada ki pynmeh lait ruh. Ym tang katta hynrei ha ki bun ki bynta ba sharum jong ka Nongstoiñ kata ha ki shnong shwa ban poi Mawshynrut, ka jingthang rnga ka jur palat.
Katei ka jingthang rnga bad pom pathar ïa ki khlaw ka dei ka kam kaba la leh hi da ki paidbah nongshong shnong, da kaba kam ba ka jingbteng jong ki ban thang rnga, ka dei na ka daw jong ka jingkyrduh bylla namar ba la khang ban tih dewïong. Ha kine ki sngi la sakhi ha ki thain Rambrai ruh ka jingthang rnga ka la long kaba jur bha.
Ka jingong jong ki ka lah ban long, tangba ym baroh kiba thang rnga ki dei kiba leit bylla tih dewïong, namar ka jingthang rnga ka la sdang naduh ba ka National Green Tribunal (NGT) kam pat khang ban tih dewïong. Palat mar shiteng kiba ju trei bylla bad kito ki nongkhaïi kiba ju pyndap rnga ïa ki phew tylli ki karkhana saiñ nar ha Byrnihat kim ju leit tih dewïong.
Ha kine ki sngi ki khlaw ki btap ki la nang syllen, ka jingpyn sniew dur ïa ka mariang ka la nang jur bad lada ki bor sorkar kim leh da kaba tyngeh ban khang lad ïa ka jingpynlulor ïa ki khlaw ki btap, da kaba pyntreikam pura ïa ki aiñ, khlem artatien kan wanrah ïa ka jingeh kaba khraw ha ki snem ban wan.
