Jur ka jingpyrshah ïa ka Casino, dawa ka HYC ïa ka Sorkar ban sngap ïa ka sur u paidbah

Shillong, Nailur, 13: Ka Hynñiewtrep Youth Council (HYC) ka la pynpaw ïa ka jingbitar halor ka jingbym sngap jong ka Sorkar Jylla ïa ka sur jong ki paidbah kiba pyrshah ban wanrah ïa ka Casino ha kane ka jylla.
“Ha ka 28 tarik, Nailar, 2022 u Symbud Myntri Rangbah ka Jylla u Bah Prestone Tynsong u la kren da kaba shai lyngba ki lad pathai khubor ba ka Sorkar MDA hapoh ka jingïalam jong ka NPP ka la rai ba da leilei ruh yn ym shah plie ïa ki Casino ha Meghalaya hadien ba lah mih ki jingpyrshah ba jur na kiba bun ki Seng, ki Dorbar Shnong, Raid, Hima, ki Nongïalam niam baphet bapher bad wat ki paidbah hi ruh. Ha kine ki khyndiat sngi u Myntri Rangbah ha ka jingïakynduh bad ki nongïalam shnong na thaiñ Ri-Bhoi u la pyntikna bad kular ba ka Sorkar kan ym ïaid shakhmat ban buh ïa ki jaka ïa khalai ne Casino ha kano kano ka Distrik lada don ka jing pyrshah na ki paidbah,” ong ka HYC ha u kyrwoh ba la phah da u Vice President u Bah Rhembor G. Saibon.
“Hynrei kitei ki jingkren bad ki jingkular ki kylla long kamkai lut hadien ba la paw tyngkreiñ ba watla bun kiba pyrshah ruh ka Sorkar kam kheiñ snep bad suidñiew satia ïa ka sur uba bun balang bad ka la ïaid shakhmat ban ai jingbit ïa ki lai ngut ki briew na ka bynta ban buh ïa kine ki jaka ïakhalai ha ka Jylla jong ngi. Kane ka la paw lyngba ka jubab u Myntri ka tnat Taxation u James Sangma hapoh ka ïingdorbar Thaw Aiñ ka Jylla hynnin ka sngi. Kane ka jingleh jong ka Sorkar hapoh ka jingïalam jong ka NPP, khamtam ki tnat kiba bat da ka NPP ki kheiñ dewthala lut ïa ka jingsngew u paid nongshong shnong ka Jylla la ka dei ïa ki Balang ne ïa ki Dorbar Trai Ri. Wei ba ki lah rai ban ïaid shakhmat ïa kano kano ka kam na ka bynta ka myntoi jongno re jongno, kam sngewdei shuh ban sngap ïano ïano ruh,” la kynthoh ka Seng.
“Ngi pyrshah jur ïa kane ka rai jong ka Sorkar ban ai jingbit plie ïa ki jaka ïa khalai ne Casino ha ka Jylla. Ngi sngew ba kine ki jaka khalai kin wanrah jingeh bad kin ktah ïa kiba bun ki nongshong shnong khamtam ïa ki khun samla kynthei bad shynrang bad ïa ki longing longsem hi baroh khlem da thew la ki dei na kano kano ka niam ne ka kynhun jaidbynriew,” la ong ka Seng.
“Ha,oid, lehse kane ka rai jong ka Sorkar kan wanrah jingmyntoi lyngba ka khajna ba kan sa ïoh lum hynrei hato tang na bynta ka khajna, ngi long kiba la kloi ban ïa peiñ ïa ka lawei ki khun samla bad ka lawei jong ki nongshong shnong jong ka Jylla hi baroh kawei. Hato ngi lah kloi bad hun mynsiem ban pdiang ïa ki jyrsieh ki ban mih bad ktah ïa ka imlang sahlang lyngba kine ki kam khalai?” la buh jingkylli ka Seng.
“Ka Seng ka khot ka wer ïa ka Sorkar, ïa ki MLA/MDC bad ïa ki ophisar Sorkar baroh ba kin sngewbha ban da puson bad pyrkhat bha halor kane ka kam bad shim rai da ka jingkitkhlieh ba hato ki ki jaka ïa khalai kin ktah kumno ïa ngi kum ka Jylla? Kaba kumno ka lawei ngi kwah na ka bynta ki khun samla bad ki Nongshong shnong ka Jylla? Hato kita ki jaka ïa Khalai kin wanrah ka jingbha ne pynroi ïa ki kam sniew ne ngi shu kmen tohhoh tang namar ba ngi ïoh lum khajna shibun shibun na ki?” la ong shuh shuh ka HYC.
Ka Seng ka dawa ba ka Sorkar ka dei ban sngap ïa ka rai jong uba bun ba lang ha shuwa ban pyntreikam ïa kane ka Aiñ bad ka dei ban pynsangeh shwa ïa kita ki lai tylli ki laisen ba ladep ai.