Khliehriat, Naitung, 29: Ki Pulit jong ka Umkiang Patrolling Post ryng ka jingïatreilang bad ki Pulit jong ka Ratacherra Anti-Infiltration Check Post hapoh ka jingïalam jong u Sub Inspector S. Buam lem bad ki shipai Border Secrurity Force (BSF) ka Umkiang Border Out Post ha ka sngi Palei ki la pynlong ïa ka jingkhynra kaba jur hadien ba la ïoh jingtip na ki tnat syntiat halor ka jingwan rung tuh jong ki nong shong shnong ka ri Bangladesh sha u pud u sam ka ri India lyngba ka khappud jong ka East Jaiñtia Hills District.
Katba ki Pulit bad ki shipai BSF ki dang pynlong ka jingap ktem ki la ïohi ïa uwei u briew uba la wan ïaid lynti na khlaw hana ka shnong Pyrtakuna bad uba la rung hapoh kawei ka kali Alto rong grey kaba don ïa u numbar AS-11-CC 4582.
Tang shu ïohi ïa ki Pulit bad ïa ki shipai BSF, une u nong Bangladesh bad uba ñiah ïa ka kali ki la phet krad hynrei ki Pulit bad ki BSF ki la ïoh khang kdong ïa ka kali ha Kuliang.
Hadien ba la tohkit, u nongniah jong ka kali u la pynithuh ïalade ba u kyrteng u Warif Uddin Laskar na Sarapur, Gumrah Assam bad nalor kata um shym la lah satia ban ai ïa ka jubab kaba shai.
Haba la tohkit sa ïa une u nongshong kali, u la kren pynban da ka ktien Bengali. Da ka jingïarap jong ki katto katne ki nongshong shnong kiba sngewthuh ïa ka ktien Bengali, une u nongshong kali u la pynithuh ïalade ba u kyrteng u Masum Uddin na ka ri Bangladesh bad shuh shuh u la phla ba ki dang don bun ngut kiwei pat ki nong Bangladesh kiba la wan rung be-aiñ sha u pud u sam ka ri India hynrei kiba la phet rieh sha khlaw tang shu ïohi ïa ki shipai BSF.
U Superintendent of Police ka East Jaiñtia Hills District u Jagpal Singh Dhanoa ha u kyrwoh ba la phah sha ki lad pathai khubor u la pyntip ba ïa u Warif Uddin Laskar bad ïa u Masum Uddin la rah sha Lumshnong Police Station na ka bynta ban pynlong shuh shuh ïa ka jingtohkit kaba bniah bad la pynngat ruh ïa ki hapoh ka kyndon 13/14 jong ka Foreigners Act.
U SP u la pyntip ruh ba ha kine ki san phew ar sngi ba la leit noh, haduh 26 ngut ki nong shong shnong ka ri Bangladesh kiba la wan rung be-aiñ sha u pud u sam ka ri India ki la shah kem ha East Jaiñtia Hills District bad saw tylli ki case ladep rejistar bad la pyndep ruh ïa ka kamram katkum ka aiñ.
