Jur ka jingkit shyiap beaiñ ha thaiñ Warmawsaw, jot ki lynti bad surok, byrngem ka FKJGP

Nongpoh, Jylliew 05: Wat hadien ba ka naka liang ka sorkar bad bor district kila khang pyrshah ïaka jingtih lane khlong shyiap kaba wanrah ka jingjot ïaka mei mariang, bun naki kali kit shyiap ki dang ïaid sahuh haka thaiñ Warmawsaw, Mawdem kiba kit palat pud bad pynjot ruh wat ïaki surok bad lynti ïaid bad buh jingma ruh ïaki paidbah haka leit ka wan.
Naka liang kiba bun ki paidbah kila ud la nam halor ka jingbun ki kali dumper kiba kit shyiap bad kit palat pud ha katei ka thaiñ kiba pynthud ruh ïaka leit ka wan bad pynjot ïaki surok bad lynti ïaid nalor ka jingkit bad tih beaiñ ïa u shyiap.
Halor katei ka bynta naka liang ka seng FKJGP Western Zone kala pynpaw ka jingsngewkhia halor ka jingjur ki trok kit shyiap ha katei ka thaiñ kaba kitei ki trok kim kheiñ snep ban pynjot wat ïaki lynti ki syngkien kumba la sakhi ruh kawei ka jingkieng ha katei ka thaiñ kala hap bad pei thliew kaba buh pynban ka jingma ïaki paidbah nongleit nongwan naka jingjur ki trok kit shyiap kiba ïaid na katei ka jaka.
Haba kren bad u nongthoh khubor naka liang u Bah C Doloi President ka FKJGP Western Zone u la ong ba kum ka seng kan nym shong kli kti halor katei ka jingjur ki kali kit shyiap kiba ïaid sahuh ha katei ka thaiñ bad shen naka liang ka seng kan sa lum lut ïaki noongïalam shnong, ki para sengbhalang naka bynta ban leh eiei bad ban ujor sha ki bor ba dei peit namar ka jingpynjot ïaki lynti syngkien bad buh jingma ïaki paidbah haka leit ka wan nalor ka jingkit palat pud ïa u shyiap.