Jur ka jingkhaïi beaiñ ïa ka shini sha Bangladesh, thoh u Social Activist sha u DC-SGH

Shillong, Risaw, 17: U Greneth M Sangma uba long u nongtrei mon sngewbha ha ka sngi Palei u la kyntu ïa ki bor synshar jong ka South Garo Hills District ban shim khia ban pynthikna ïa ka shongsuk shongshngaiñ jong ki nongshong shnong bad ki nongleit jingleit ha shilynter ka khappud Indo-Bangla bad ban leh da kaba tyngeh ïa ki nongkhaii kiba donkti ha ka kam khaii beaiñ ïa ka shini sha ka ri Bangladesh.
Ha ka shithi ba la phah sha u Deputy Commissioner jong ka District, u Sangma ula ong ba ka long kaba donkam ban pynkhlaiñ ïa ka jingpahara ha khappud da ka jingdon jong ki shipai Border Security Force (BSF) ha shilynter ka khappud Indo-Bangladesh.
“(Nga kyrpad ruh) ban pyntreikam tista ïa ka jingïaid pahara ha shilynter ka khappud ban tem ïa ki kam runar ruser bad ban pynlong ïa ki jingpynshai paidbah bad ki jingïalang ha ki shnong ki thaw khnang ban pynsngewthuh bad ban hikai ïa ki paidbah kumno ban ïada ïalade bad ban ïatreilang bad ki bor jong ka aiñ,” u la ong.
Kane ka jingdawa ka long hadien ba ka la mih ka jingjia ha ka sngi Balang ha Netri, ha kaba ar ngut ki nongleit jingleit kiba shong da ka thuk thuk ar shaka, ki la shah pakhang lynti, shah byrngem bad shah lute ha ki runar na ka ri Bangladesh hajan jong ka ktem sah ki shipai BSF ha Netri. Ki nongleh kam bymman, kiba rah da ki tiar pynmynsaw da ki wait bad ki tari, ki la rong ei wat ïa ka thuk thuk Pulsar bad iehnoh shadien ïa ki lanot.
“Kane ka jingjia ka la pynher syrngiew ïa ki nongleit nongwan ha khappud bad la donkam ban leh eiei khnang ban ïada ïa ki nongshong shnong,” u la ong.
Shuh shuh u Sanmga u la ong ba u la ïoh jingtip ruh ba ki don ki nongkhaii kiba ju die tuh ïa ka shini lyngba ka iew Baghmara da kaba shim kabu ïa ka jinglong jingman ha ka ri Bangladesh.
“Nga kyrpad ïa phi ban shimkhia mardor ban pynsangeh ïa ka jingkhaii shini tuh bad ban khot hajir wat ïa ki nongkhaii kiba donkti ban khaii tuh ïa ka shini. Lada ki dang ïai bteng ban leh ïa kine ki kam beaiñ, ïa ka laisen jong ki dei ban pyndam noh mardor,” u la ong.
Une u nongtrei monsngewbha u la ïai ban ruh ba la donkam ban phah tohkit ïa ki nongkhaii kiba donkti ha ka jingkhaii tuh, ban pynshisha ïa ka jaka buh ïa ka shini bad ban leh tyngeh katkum ka aiñ lada lap ïa kito kiba donkti da kaba pyndam noh mardor ïa ka laisen nalor kaba jurip bad kaba peitngor ruh ïa ka die ka thied ha iew Baghmara.