Nongpoh, Risaw 07: Kiba bun ki nongri sniang ha Ri Bhoi ki la lynniar bad mad ïa ki jingeh kiba khraw halor ka jingwan lynshop ka khlam ba bun na ki sniang ba ki ri ki la shu iap kynsan bad kaba la wan rah ruh ka jingduhnong kaba khraw ïa ki nongri Sniang.
Kum ban pynkynmaw, kawei na ka seng ki nongrep ha ka jylla ba la tip kum ka Hill Farmer Union na ka seng kmie bad na Ri Bhoi dang shen ruh ki la wan ban kynduh ïa u Deputy Commissioner ka Ri Bhoi u Abhilash Baranwal bad kumjuh ruh ïa ka District Veterinary Officer ka Nongpoh, ban ïa kren halor kane ka jingeh ki nongri sniang, namar kumba la ïoh lum jingtip da ka seng kiba bun ki nongrep ki la shah ktah na ka jingïap khlam ki Sniang ba ki ri na ka bynta ban kyrshan ïa ka ïing ka sem.
Kumba la ïoh lum jingtip, kane ka jingïap ki Sniang ka la sdang ban saphriang sha bun tylli ki shnong ha Ri Bhoi District, ki shnong kiba shah ktah ki kynthup sha ka thaiñ Umroi, ka thaiñ Mawhati, ka thaiñ Nongpoh, ka thaiñ 20mer bad kiwei kiwei ki shnong. La ong ba ki Sniang tang mar ïa ïoh ïa katei ka jaid jingpang ki la shu ïap ha kaba bun na ki sem Sniang ki la thylli.
La ïathuh ruh ba kane ka jingïap ki Sniang ka ktah bha ïa ki nongri Sniang, namar ba shisien ba la pang uwei u sniang ka la ïa bit lut ne saphriang sha baroh ki Sniang ba ki ri kiba don hapoh ki sem, ha kaba kane ka la ktah bha ïa ki nongri Sniang ha Ri Bhoi
Ki nongri Sniang ki la ïathuh ruh kaba kham pang met bha ka dei ka jingïap jong ki sniang kiba la dei ka por ban die noh, ha kaba kane ka la ktah bha ïa ka ïoh ka kot jongki, namar ha ka por ba la dei ban ïoh jingmyntoi ki Sniang ki la ïap noh bad kaba kham ktah ruh ki don ki nongrep kiba shim da ka ram ban ri Sniang ha kaba ka jingwan kane ka khlam ka la ktah da kaei pat ba kin siew ïa ka ram kaba ki la dep ban shim ban ri Sniang.
Halor kane ka jingshah ktha ki nongri Sniang, ka seng HFU ka la dep ruh ban kyrpad ïa u deputy commissioner ka Ri Bhoi bad ruh ïa ka District Veterinary Officer ba kin shim khia ban thaw ïa ki lad ki lynti ban tohkit halor ka jingïap jong kine ki sniang. Ki la pynpaw ruh ba kane ka lah ruh ban ktah na ka jignwan poi ki Sniang kiba na shabar ka jylla kiba lah ban wan rah ïa ka khlam ba la ju tip kum ka African Swine Fever na ka daw ba kam ju don kano kano ka jingtohkit ïa ki Sniang ba wan na shabar shwa ban wan rung sha ka jylla.
Kitei ki nongïalam ka HFU ki la dep ruh ban pynpaw ba ki la dawa ba buh ïa ka khyrdop ban tohkit ïa ki Sniang kiba wan shalan na shabar ka jylla shuwa ba kin rung sha ka jylla, namar kumba long haduh mynta bun ki sniang na shabar ki wan poi sha kane ka jylla bad lada shah ktah pat ki nongri sniang mano ban shim ïa ka jingkitkhlieh.
Shuh shuh, ki la dep pynpaw ruh ba ïa kane ka kam ki la rai ban pynsngew ruh sha u Myntri sorkar bad ruh wat sha u myntri rangbah ka sorkar jylla, namar kumba long mynta ki jingwan rung ki sniang ne kiwei kiwei ki jingri na shabar ka long laitlan bad kam don kano kano ka jingtalasi ne pyrkhing da ka sorkar.
