Shillong, Nailur 07: Watla ka sorkar jylla kam pat pynbna ïa ka tarik ban pynlong elekshon MDC hynrei ka jingïaknieh tiket pat ka la sdang ban shongshit bha hapdeng ki Nongkyrshan bad nongïalam ba hakhmat jong ka NPP ha ki constituency bapher bapher.
Katkum ka jingïathuh da u Working President ka NPP Bah Hamlet Dohling mynta jan baroh ki Constituency ki don beit 2 – 3 ngut ki kyrtong pan tiket na ka bynta ban aireng ha kane ka elekshon MDC kaba lah ban long noh ha kine ki khyndiat bnai ban wan.
“Bun ki constituency kiba don ar haduh lai ngut kiba pan tiket ban ïakhun na ka party ha kane ka elekshon MDC kynthup ha KHADC bad JHADC. Hynrei na kine baroh dei ka Mylliem kaba buneh ki nongpan tiket namar ki don haduh 6 ngut ki kyrtong,” u la ong.
Kumta halor kane, u ïathuh ba ka party ka la shaniah ha ka Election Committee ban bishar bniah ïa ki kyrtong khnang ba kin lah ban sei ïa ki kyrtong kiba paka bad kiba don jingkyrmen ban jop.
Halor ka jingkylli, u Bah Hamlet u la kubur ba ha ki khyndiat por mynshwa ka jur bha ka jingbein ïa ka NPP ha ki rynsan social medïa hynrei katba nang ïaid ka por pat ki paidbah ki ïohi ïa ka rukom treikam jong kane ka party kaba ïalam mynta ïa ka sorkar.
Kumta u ong ba kane ka jingbun ki kyrtong kiba pan tiket na ka NPP ka pyni ruh ïa ka dak ba kane ka elekshon MDC kaban sa long shen kan long kaba shongshit bha.
Ha kajuh ka por, u Bah Hamlet uba dei ruh u MLA barim ka Mylliem u la pynshai ba um kwah satia ban mih aireng ha kane ka elekshon MDC kaban sa wan namar u kwah ban ailad ïa kiwei ki samla na ka thaiñ kiba la biang ban tynrong lang ïa ka lyngkor ha ka constituency.
“Nga kwah ban trei na bynta ka party khamtam eh ha kine ki ar tylli ki District Council kiba pynkhreh mynta ïa ka elekshon MDC khnang ba ngin lah ban leh bha,” u la ong.
Utei u nongïalam ka party u la ong ruh ba nalor ka eleskhon MDC, mynta ki pynkhreh shaid shaid na ka bynta ka elekshon shiteng samoi ha Gambegre hadien ba u MLA ka thaiñ u Saleng A Sangma u la shah jied noh kum u MP ba thymmai ka Tura.
