Jur ka jingïaid ki trok kit rnga beaiñ bad ki trok kit khia man ka miet na surok Patharkhmah-Umling

Nongpoh, Naitung, 27: Ka jingïaid beaiñ jong ki trok kit rnga bad kiwei kiwei ki trok kit khia ka la nang bteng lyngba ka surok na ka thaiñ Patharkhmah ban mih sha Umling ha kaba ym lah ban tip satia mano ba donkti ha katei ka kam tang ban lait na ka khyrdop Weighbridge ka sorkar kaba don ha Umling khamtam ka jingpynjot ïa u surok Umling-Patharkhmah.
Lah ruh ban pynkynmaw ba ka sorkar lyngba ka bor district ka la khang pyrshah bad pynjari ruh da ki kyndon aiñ ïa ki trok kit khia ban ïaid lyngba ka surok Umling-Patharkhmah bad kumjuh ruh kiba wan na ka thaiñ Patharkhmah sha Umling namar ka jingpynjot ïa ki surok bad khamtam ka jingsynjor jong ka jingkieng Lailad kaba la buh ban ïaid tang ki kali kiba hapoh 9 ton, hynrei la ioh jingtip ba ki trok kit rnga man ka miet ki ïaid lyngba katei ka surok nalor kiwei kiwei ki kali kit khia.
Dangshen ka kynhun jong ki nongïalam shnong hapoh ka Raid Sohkhwai ka la leit ruh ban ïakynduh ïa u DC ka Ri-bhoi ha kaba ïadei bad ka jingjur ki trok kit khia kiba wan na ka thaiñ Patharkhmah khamtam ha ka por mynmiet, kaba la buh jingma ïa ki paidbah nongleit nongwan na ka jingrit u surok, bad pynjot ruh ha ka juh ka por ïa u surok, hynrei kitei ki trok kim salia satia ban pynkheiñ ïa ki kyndon nalor ka jingkit beaiñ ïa ki mar khamtam u rnga, wat hadien ba ka sorkar ka la khang pyrshah ban ïaid kali kit khia na utei u surok.
Hynrei ka jingkylli ka mih mynta mano ba donkti ha katei ka kam beaiñ? Bad balei ka sorkar kam shimkhia ban tehlakam ïa ki kali kit khia kiba ïaid lyngba utei u surok bad wat ka District Council ban tehlakam ïa kitei ki trok kiba kit beaiñ kiba ïaid sahuh man la ka miet nakhmat ka khyrdop jong ka, kaba don ha Lailad?.