Jur ka dheng kali ha ka thaiñ Narpuh na ka daw ka jingdap um ka surok bad jing hap khyndew

Khliehriat, Jylliew 17: Na ka daw ka jingther jur u slap ka la don ka jingtwa khyndew ha kiba bun ki bynta ka surok national highway ha East Jaiñtia Hills District khamtam ha ka thain Narpuh, kumjuh ruh ka jingwan tuid lynshop ka um nalor ki lum kaba la lynshop beit ha surok bah ba ïaid kali, kumta ka la don ka jingthut ha ka jingiaid ki kali ha ka thaiñ bad ka la wanrah ruh ïa ka jingdheng kali kaba jur bha ha ka thaiñ Narpuh khamtam ha ka thaiñ Lumshnong, Tongseng, Sonapyrdi ter ter shaduh Malidor.
Ka long kaba shihsha ba ka surok NH-6 na East Jaiñtia Hills District (Meghalaya) ka dei ka surok kaba pyniasoh bad ki shibun tylli ki jylla kiba na ka thaiñ shtei lam mihngi bad ka jingsniew jing jot jing pra kane ka surok kaba naduh Lumshnong, Narpuh ter ter shaduh Malidor ka long kaba la palat shisha, ym tang ki briew ka thaiñ kiba kynduh jingeh hynrei ki paidbah jong ka thaiñ shatei lam mihngi ruh kiba ju iaid na kane ka surok ki mad kajuh ka jingeh jingsohat bad don ki por ba lap sa ka miet ha surok ruh na ka daw ka jingdheng kali kaba da ki bun kynta ha ka thaiñ.
Kane ka buh jingeh khamtam ïa kito ki kali ba kit nongpang bad ki kali ba don ki tymmen, ki khynnah, ki khyllung, ka jinglong ka surok ka buh jiingeh bad ha kajuh ka por ka buh jingma ruh ïa ka jingim briew namar ka surok ka la kylla kum ki pung um ba dap da ka um ktieh kiba la i kum ka surok khlaw ka bym i dei shuh kum ka surok national highway.
Na ka liang ka tnat pulit jong ka East Jaiñtia Hills District ka kyntu ia kiba ñiah kali ba kin ñiah da kaba phikir bad adkar bha bad kat haduh ba thoh ïa kane ka khubor ki khubor pulit ki ïathuh ba ki kali ki dang lait bad ïaid suki suki tang shiliang ka surok.