Khliehriat, Jylliew 14: Na ka daw ka jingther jur u slap naduh hynnin ka miet, ka la don ka jingtwa khyndew kaba jur bha ha surok national highway ha Sonapyrdi, hajan ka tunel, ka surok bah ka la dap da ka um bad ka jyrsieh khyndew, bad ki maw kiba tyllun nalor ki lum, kane ka la wanrah ïa ka jingdheng kali kaba jur bha ha ka surok NH-6 ha Sonapyrdi bad ha Lumshnong ter ter, baroh ki kali kynthup naduh ki kali rit, ki kali heh, ki la sahkut ha kane ka jingdheng kali ha ka thaiñ Narpuh, East Jaiñtia Hills District.
Ka jingtwa kaba jur bad ka jingdheng ki kali ka la sdang naduh ka por kumba 7 baje mynstep bad kat haduh ba pyllait ïa kane ka khubor, ka jingdheng kali kaba jur ka dang don ha ka thaiñ Narpuh.
Wat hapdeng ka jingther jur u slap, ki nongtrei jong ka National Highway Authority of India katba lah, ki la shim khia bad pynkhuid ïa ka surok, kumjuh ruh ki pulit jong ka Lumshnong Police Station lem bad ki pulit jong ka Umkiang Patrolling Post ki la shimkhia ha kaba pynïaid beit ïa ki kali bad kumjuh ruh ki la long peitngor ha ka ïaid ka ieng jong ki paidbah ha ka thaiñ.
Na ka liang ka tnat pulit jong ka East Jaiñtia Hills District, ka kyntu ïa ki paidbah kiba dei ïaid lyngba na ka surok National Highway-6 na East Jaiñtia Hills District, khamtam ka thaiñ Narpuh ba ki dei ban da long adkar bha ha ka rukom ñiah kali, la kyntu ïa kiba ñiah kali ba kim dei ban ñiah stet ïa ka kali.
