Jur bha ka kam tih dewïong be-aiñ ha ka jylla naduh ba shimti ka sorkar MDA-1, MDA-2, kynnoh ka VPP

Shillong, Rymphang 08: Ka seng saiñ pyrthei riewlum ka jylla ka Voice of the People’s Party (VPP) ka la ong ba ïa kane ka sorkar kaba mynta ki paidbah ki la dei ban ai da ka jinghikai kaba tyngeh bad ong ruh ba kumba la pynpaw da u President jong ka u Bah Ardent Miller Basaiawmoit ka sngewba u Myntri Rangbah ka jylla u Conrad K Sangma u hap ban shim ïa ka jingkitkhlieh bad ban hiar shuki noh namarba kane ka pynpaw ba um lah ban synshar ïa ka jylla ha ka lynti bad ka rukom kaba dei.
Kane ka jingkynthoh ka VPP ka la mih hadien ka jingjia bthei bom Dynamite ha East Jaiñtia Hills District, ha shnong Thangskoo, Mynsngat ha ka 5 tarik mynta u bnai ha kaba la wanrah ka jingkhlad jong kiba bun ki briew kiba dei ki nongbylla kiba leit tih dewïong sha katei ka thaiñ.
Ha kaba ïadei bad kane u nongaiktien ka VPP u Dr. Batskhem Myrboh haba kren u la ong ba ka VPP ka pynpaw ïa ka jingpynrem kaba jur bha ïa kane ka sorkar MDA kaba la ïalam khmat da ka NPP ha kane ka jylla ha kaba ïadei bad ka jingjia jingbthei Dynamite ha East Jaiñtia Hills District ha Thangksoo ha kaba ki nongtih dewïong ba la palat phewngut ki la duh leh nohei ïa la ka jong ka jingim.
“Kane baroh ka mih na ka daw jong ka jingbym lerkam bad ka jingbym kitkhlieh jong kane ka sorkar MDA ban pynkut bad ban tehlakam ïa kane ka jingtih dewïong beaiñ. Kane kam long shuh kaba thymmai bad ïa kane ngi ïohi ba ka khamjur hadien ba la shimti kane ka sorkar MDA 1, MDA 2, haoid mynshwa kane ka sorkar hapoh ka jingïalam jong ka NPP bad u Conrad K Sangma kum u Myntri Rangbah ki la len ïa kata ka jingdon kata ka jingtih dewïong beaiñ hynrei da ki jingjia kawei hadien kawei, kaba la sdang naduh ka jingshlei um hapoh ka krem bad hadien ka jingbthei biang u Dynamite ha kajuh ka krem ha u snem 2025 bad bud pat sa mynta u bnai, kane ka pyni shai bad ka pynpaw pyrthei ïa ka jingïaibteng jong ka jingtih dewïong beaiñ,” ong u nongaiktien ka VPP.
Na ka liang jong u, u la ong ba kane ka jingtih dewïong beaiñ ka ïaibteng kumne dei namar ba kane ka sorkar kam shimkhia ïa ka ban tehlakam ïa ka bad kawei na ki jingbym shimkhia kane ka sorkar ka long ba kam shym la lah ban tehlakam ïa ka jingkit tuh ïa uta u dewïong ne illegal transportation of coal, ïa kane, kum ban shu pynkynmaw ba wat ka Meghalaya High Court ruh ha ki por ba la leit noh ka la kren bad pynpaw ïa ka jingbym lah shuh ban shaniah ha ka sorkar jylla ïa ka ban tehlakam ïa kane ka kam bad ka sorkar jylla haduh mynta hi, wat lada ka don ka bor ha ka lyngba ka Tnat ki Kam Pohïing bad ki pulit, hynrei la ïohi kane ka ïaibteng bad kane ka pynpaw ïa ka jingbym kitkhlieh ka sorkar bad lah donkam ba ïa kane ka sorkar ki paidbah kin hap ban ai ka jinghikai kaba tyngeh.
U nongaiktien ka VPP ula bynrap shuh shuh da kaba ong, “Ngi na ka liang ka party kumba la pynpaw da u President ka party u Bah Ardent Miller Basaiawmoit, ngi sngewba u Myntri Rangbah un hap ban shim ïa kane ka jingkitkhlieh bad ban hiar shuki noh namarba kane ka pynpaw ba um lah ban synshar ïa ka jylla ha ka rukom bad ka lynti kaba dei.”