Jur bha ka kam khaïi bad dih drok ha ka thaiñ Shillong Cantonment Board, ong u Bah Paul

Shillong, Nailur 09: U Myntri ka tnat Social Welfare u Bah Paul Lyngdoh ha ka sngi Nyngkong u la lum ka jingïalang bad ki 10 tylli ki dorbar shnong jong ka West Shillong constituency bad u la pynthikna ba un shim ki sienjam ban tehlakam ïa ka jingkharoi sted ki kam dih bad die drok ha ka thaiñ.
Haba kren sha ki lad pathai khubor u Bah Lyngdoh u la ong ba ha ka jingïalang la lah ban kren bun kiei kiei kiba ïadei bad ki kam khaïi bad dih drok hapoh ka thaiñ kum ki shnong kiba la tip kum ka Lumsohphoh, Upper Mawprem bad Mawbah bad ban pynïar sha kiwei pat ki jaka jong nongbah.
“Ha kane ka jingïalang, la ïakren ruh ïa ka jingshisha ba ka jingkhaïi bad dih drok ka jur bha ha ki jaka ba hab hapoh ka Shillong cantonment board,” ong u Bah Paul.
“Haba phai sha ka kam khaïi bad dih drok, kan long kaba eh shisha ban ïakhun na ka daw jong ka jingduna ki nongtrei. ïa kane la leh ruh da ka rukom thung kam kaba thymmai ha ka tnat pulit bad ngi khmih lynti ba ngin sa lah ban ïoh bun ki nongtrei ban tehlakam ha ki jaka ba jur bha ki kam khaïi bad dih drok,” u la bynrap.
Shuh shuh u Bah Lyngdoh u la pyntip bad ki la don bun ki jingai jingmut ha kane ka jingïalang ba kynthup ban pynhab ïa kine ki jaka hapoh ka MRSSA, 2016 na ka bynta ban register mardor ïa ki nongshong shong kane ka thaiñ.
Ha ka jingïalang, ha kaba khatduh la ïakren ban thaw noh da ka village defense party (VDP).
“Kumba long mynta ki la don haduh 17 tylli ki VDP hapoh Shillong bad dalade nga la kyrpad ïa ki Dorbar Shnong ban bud ïa kane ka jingkyrpad jong ngi ban thaw ïa ki VDP ha ki shnong bapher bapher,” u la ong.
“Wat la ki lad ki duna bad ym lah ban poi shaduh ka kyrdan ba la khmih lynti, ngan pynthikna ïa ki dorbar shnong ngin sa shim khia halor kane. Nga la dep ban khot ka jingïalang la kumba 2 sien ban ïasyllok bad u Symbud Myntri Rangbah ba khmih ïa ka tnat Kam Pohïing ka jylla bad ngin shim ïa ki sienjam ban ai ki jingsiew ïa ki volunteer kaba mynta kam pat biang hynrei ynsa kyntiew ïa ka,” ong u Myntri.