Nongpoh, Ïaïong 03: U District Magistrate, Ri-Bhoi District, Nongpoh, ha ka jingpyndonkam ïa ka bor ba la pynkup ha ka kyndon 163 jong ka Bharatiya Nagarik Suraksha Sanhita (BNSS), 2023, u la pynbna ïa ka hukum kaba khang ban ïaid ïa ki kali heh kiba kit palat ïa ka 9-ton lyngba ka surok Mawmaram-Nongthliew-Mawmih ban mih sha Mawlyndep.
Ïa kane ka hukum la pynmih dei namar ka jingjot jong u surok namar ka jingïaid jong ki kali kit khia, kaba la buh jingma ruh ïa ki paidbah kiba leit ba wan khamtam ki khynnah skul bad kiwei kiwei kiba pyndonkam ïa utei u surok.
Ban pynthikna ïa ka jingshngaiñ jong ki paidbah ba leit ba wan bad khamtam ban ïada naka jingjot shuh shuh utei u surok, ki bor district kila shim ba ka long kaba donkam ban pynjari ïa katei ka hukum bad ki kyndon, bad kane ka kyndon kan treikam mardor tad haduh ban da pynbna da kumwei, bad kino kino kiba leh pyrshah kin ngat haki kyndon jong ka aiñ.
Shuh shuh la kyrpad ruh ïa ki paidbah, ba kin ai ka jingïatreilang bad ban bud ryntih ïa kane ka hukum.
