Junior Boys National Football C’ship 2025: Pynkut ka Meghalaya da ka namrem ha ka Tamil Nadu

Shillong, Naitung 27: Ka kynhun phutbol jong ka Meghalaya ka la pynkut ïa ka lynti ïaid jong ka ha ka lympung ïalehkai Junior Boys National Football Championship 2025 (Tier 1) na ka bynta ka Dr BC Roy Trophy hynnin ka sngi Thohdieng da kaba mad biang ïa ka nam rem noh da 2-1 kol pyrshah ïa ka Tamil Nadu ha Amritsar.
Shuwa kane, ka Meghalaya ka la mad ïa ar tylli ki namrem ha ka West Bengal bad Kerala, kaba pynlong ïa ka kynhun ban wan sha trai duh jong ka Group B khlem da ïoh ban kamai poiñ (0 poiñ) hadien ka jingïakhun kaba jwat pyrshah ïa ki kynhun ba khlaiñ bor, kaba la ai shibun ki jinghikai ïa ki rangïalehkai.
U Bah Seibor Sana, Coach ka kynhun, u la pynkylla ar tylli ki bynta jong ka kynhun ba sdang, ha kaba u Mewanpyntngen Lyngkhoi bad u Robindor Kyrsian ki la mih madan ha ka sien kaba nyngkong ha ka jaka jong u Dasukbanphrang Diengdoh bad u Clifford Buam.
U A Suresh (34’) u la pynkhih ïa ka kol kaba nyngkong jong kane ka jingïalehkai na ka bynta ka Tamil Nadu shuwa ba u Medonbanshan Kurkalang (81’) un pynïakhaid shipor ïa ka Meghalaya ha ka kylla miet.
Hynrei ka Meghalaya kam shym la lah ban bat skhem ïa ka kol ha kaba ka Tamil Nadu ka la ïoh thep biang ha ki minit pynjlan jong ka por lyngba u Iniyan Chandar M (90’+4) ban pynthikna ïa ka namjop.