Junior Boys National Football C’ship 2025: BC Roy Trophy : Mad ka Meghalaya ïa ka namrem ha ka jingïalehkai ba nyngkong

Shillong, Naitung 21: Ka Meghalaya ka la mad ïa ka jingshah rem kaba jur ha ka kynhun ïalehkai jong ka Kerala, kata haduh 5-1 kol ha ka jingïalehkai kaba nyngkong jong ka Jylla ha ka Junior Boys National Football Championship 2025 (Tier 1) na ka bynta ka Dr BC Roy Trophy ha Amritsar hynne ka sngi Nyngkong.
Ka Kerala ka la pynkhihjar nyngkong ha kane ka jingïakhun jong ka Group B lyngba u Muhammed Mijuwad (10’) shuwa ba ka Meghalaya kan pynïakhaid lyngba u Baniar Kharsahnoh (18’) hadien 8 minit.
Ka jingïakhun ka la neh beit tang mar kawei ka kol (1-1) haduh kaba kut jong ka kylla step hynrei ka Kerala ka la lah ban synshar donbor ha ka kylla miet, da kaba thep sa saw tylli ki kol lyngba u Jithu B (48’), u Mohammed Sinan P (64’, 76’) bad u Muhammed Hayan TP (84’).
Ka Meghalaya kan hap ban bishar bad hikai ïalade na kane ka jingïakhun bad ban wanphai da kaba tyngeh ha ka jingïalehkai kaba bud ka ban sa long hadien ar sngi, ka ban long pyrshah ïa ka lahduh ba ïada ïa ka burom ka West Bengal lashai ka sngi Balang. Ka West Bengal ka la jop ïa ka jingïalehkai kaba nyngkong jong ka pyrshah ïa ka Tamil Nadu da 2-1 kol.