Junior Boys National Football Championship 2025 : Watla tam 2 kol rem ka Meghalaya ha ka West Bengal, dang sah 0 point ha ka Group
Shillong, Naitung 23: Ka kynhun ïalehkai jong ka Meghalaya ka la mad biang ïa ka namrem kaba ar sien lynter ha ka lympung ïalehkai jong ka Junior Boys National Football Championship 2025 (Tier 1) na ka bynta ka Dr BC Roy Trophy ha Amritsar hynne ka sngi Balang (23 tarik Naitung).
Ha kane ka jingïalehkai, ka Meghalaya ka la lamkhmat da ar kol hynrei kam shym la lah satia ban pynskhem ïa ka jingkyrmen ban khur ïa ki lai point ha kaba ka West Bengal, kaba dei ka kynhun kaba dang ïakhun ban ïada ïa ka nam lahduh, ka la pynphai kylla da 4-2 kol ban jop ïa ka jingïalehkai.
U Coach Seibor Sana u la pynkylla ar tylli ki bynta ïa ka thup kynhun ba sdang ha ka jingïakhun kaba nyngkong ha ka Lah Sngi U Blei, ha kaba u la wanrah ïa u Alvin Kharbani ban ap kol ha ka jaka jong u Thrisilbirth A Sangma bad ruh u la jied ïa u Skhemlang Marthong ha ka jaka jong u Shanborlang Khongjee.
U Chanjib Chetry u la pynkhih ïa ki ar tylli ki kol na ka bynta ka Meghalaya ha kane ka jingïakhun kaba ar jong ki na ka Group B, da kaba thep ha ka minit kaba 13 bad 38 jong ka kylla step.
Hynrei, u Rajdeep Paul (44′) u la lah ban pynduna ïa ka kol lamkhmat jong ka Meghalaya da kaba thep shi kol na ka bynta ka Bengal shuwa ban kut ka kylla step, bad nangta u la thep sa ar tylli ki kol ban kynjoh ïa ka hat-trick ha ka kylla miet, da kaba thep ha ka minit kaba 78 bad ha ka khyllipmat jong ki minit pynjlan (90+4’). U Sagen Hansda (77′) u la pynkhih ïa kawei pat ka kol na bynta ka West Bengal.
Ka Meghalaya ka la shah rem noh da 5-1 kol ha ka jingïalehkai kaba nyngkong pyrshah ïa ka Kerala ar sngi mynshwa (sngi Nyngkong) bad kumta ka sah sa tang ka jingïakhun ban lait na ka shah pynhap ha ka Tier 2 pyrshah ïa ka Tamil Nadu ha ka sngi Thohdieng. Kumjuh hynne ka sngi ka Tamil Nadu ka la ïakhaid da 0-0 pyrshah ïa ka Kerala.
Ha ka thup kyrdan, ka West Bengal ka ïoh 6 point, ka Kerala 4 point, ka Tamil Nadu 1 point bad ka Meghalaya 0 point.