Khliehriat, Nailur, 03 : U Bah Arkijuh Dkhar u nongshong shnong ka East Jaiñtia Hills District, ha ka sngi Baar u la aiti da ka jingthoh ha u Deputy Commissioner ka East Jaiñtia Hills District da kaba kyntu ban shimkhia ban phah maramot noh kham kloi ïa ka jingkieng Mynkseh kaba don ha surokbah National Highway ha Ladrymbai namarba ka la sniew palat bad buh jingma ïa ka jingim briew kat haduh ba ki nar rod ki la mih lut shabar.
Khnang ba kan ym buh jingma ïa kiba ïaid na ka jingkieng u la kyntu ruh ba donkam ban buh da ki Signboard ba ym dei ban pynher stet ïa ki kali katba ym pat dep ban maramot bha khnang ba kiba ñiah kali khamtam ha ka por mynmiet kin long phikir haba poi ha ki bymta kiba buh jingma.
Katkum ka shithi, u Bah Dkhar, u la kyntu ïa u DC ba un pynlong ïa ka jingjurip ïa ka jingkieng ha Ladrymbai bad un lap ruh ba wat ki nar ba la siang ha jingkieng ruh ki la paw shabar bad kane ka paw shai ba ka jingkieng ka la julor bha bad bun sa ki khohruh khohram, ki thliew ba buh jingeh ïa kina ñiah kali, ïa kiba ïaid lyngba na kane ka jingkieng.
Nalor katei ka jingkieng, la bynrap ruh ba ki don bun ki bynta wat ha shi lynter ka surokbah National Highway hapoh ka district ha ki jaka ba pynïasoh lang ïa ka surok ba siang da ka rong bad ka bynta ba siang da ka dewbilat ka ju buh jingeh bha ïa kiba ñiah kali namar ka jingbym biang bha ka rukom ban pynïasoh bad kane ka jinglong jingman ha surokbah National Highway kan wahrah ïa ka jingjot jingjulor ki kali kiba ïaid bad ka lah ban buh jingma ïa kiba ñiah kali bad kumjuh ruh kiba ïaid ha lynti bad kane ka jingbym bit bym biang ka rukom ban pynïasoh ïa ka surok kaba dei ka bynta ba siang dewbilat bad ba siang da ka rong ka dei ha baroh shilynter ka surok NH-6 ha East Jaiñtia Hills District.
U Bah Dkhar u kyntu ba donkam ban pynbit pynbiang kham kloi ïa kane ka bynta ruh.
