Nongpoh, Rymphang 25: Ha kawei ka jingjia aksiden kaba la jia hynnin ka miet, 2 tylli ki baranda iing haka shnong Quinine kila julor hadien ba kawei ka kali Tata Nexon kaba don ïa u number AS-01-FY-9950 kaba ñiah da u Sonuwbal Raj Dutta na Beltola, Assam, ka la leit rung sha ki baranda jong ki ïing briew.
Katkum ka jingtip bala ioh lum la ong ba kane ka jingjia ka la jia kumba 8:15 hynnin ka miet katba katei ka kali kaba dang hiar na Shillong sha Guwahati ha kaba u nongñiah hapdeng ka jingdih buaid u la pynher sted ïaka kali haduh ba um lah shuh ban tehlakam ïaka kali bad rung beit sha baranda ki artylli ki ïing kiba don harud surok kaba dei ka ïing jong ka Kong Tridalis Jyrwa bad ka Kong Biola Nongbet haduh ba ki baranda iing kila julor kumjuh ruh katei ka kali kaba la leit ban tynrah kala julor haki bynta ba shakhmat.
La ïoh jingtip ruh ba ha kali ki don ar ngut ki briew, ba kynthup ïa u nongñiah katba uwei pat u paralok u la phet krad hadien ka jingjia.
Shuh shuh, ha katei ka kali la lap bun tylli ki bilor kyiad bad naka liang ki pulit ki la poi mardor sha ka jaka ban pynlong ka jingtohkit bad rah noh ïa katei ka kali ha thanad Nongpoh.
