Nongstoiñ, Nohprah, 09: La hynñiew snem kynthih ki la ïaid naduh ba la shna bad siang rong ïa ka surok na Ktiehthawïar haduh Langpih kaba jngai kumba 9 kilomitar. Hynrei, ha kine ki sngi katei ka surok ka la jot rathai bad ki kali ki la shem shitom bha ban ïaid, ha kaba don ruh ki bynta ha katei ka surok ki bym ithuh shuh ba ka dei ka surok ba la siang rong, namar ka la long thik kum ka surok kaba dang sdang ban siang maw.
Watla katei ka surok ka dei kaba donkam bha na ka bynta ki paitbah nongshong shnong, hynrei haduh mynta ym pat don satia ki Muster roll kiba peit ban khmih bad ban maramot ïa ki jaka ba long thliew malu mala, ban pynkhuid ïa ki nala bad ki sañium ha baroh ar liang ka surok kumba long ha kiwei pat ki surok hapoh ka district.
Haba ïaid lyngba ïa katei ka surok da ki kali rit ne kali heh ruh hap ban phikir bha, namar la tap lut da ki sañium na baroh arliang bad ym I dei shuh ban ong ba ka dei ka surok, hynrei la I dei ban ong ba ka dei ka lynti masi ne ka lynti leit lyngkha khamtam eh ha ki jaka ki bym don shnong briew.
Ym tang katta ha kiba bun ki bynta katei ka surok ka rong kaba la dep siang ka la sdang ban khoh lut bad ka surok ka la long kaba khohruh khohram. Ki don ruh katto katne ki bynta kiba dei ki shnong briew, ba ki paitbah shnong ki la shu pynkhuid malu mala tang ban lait na ka jingtaplup ki sañium na shilliang sha shilliang.
Kum ban pynkynmaw ba ha ki snem ba la dep na ka liang ki nongïalam ka Federation of Khasi Jaiñtia & Garo People (FKJGP) Ri Muliang Circle, ki la dawa na ka tnad PWD ba kan thung noh da ki muster roll kiba peit ban khmih ïa katei ka surok, hynrei imat na ka liang ka PWD kam pat leh ei ei halor katei ka jingdawa jong katei ka seng.
Ha kaba ïadei bad ka jingthung ïa ki Muster roll ki ban peit ban khmih ïa ki surok imat ka PWD kam don kam shuh ban thung thymmai ym tip na kano ka daw. Lehse ka sorkar ïa kiba kum kitei ki kam lyngkhot lyngkhai kam sngew donkam shuh ban kin dang ïai bteng ban treikam.
