Shallang, Jylliew 11: Ka HYC Umdang area unit ha ka sngi thohdieng ka la lap ïa ka jingjot rathai bad ym don nongtrei ha ka ophis Sorkar ba la tip kum ka Animals & Husbandry Veterinary Shallang. Na ka liang ka seng hapoh ka jingïalam jong u President u Samla Phersngi Nongbri, u la ong ba ha ka jingshisha la don ki Doctor kiba mut ban wan ban trei ha katei ka Department, hynrei kaba sngewsih ka long ba hadien ba kitei ki Doctor ki la wan poi ha katei ka jaka ki lap ba ki ïing kim long shuh ban treikam bad kumjuh ki ïing sah ki long shuh ban sah. Kumta kim banse ba ki leit phai noh sha la shnong.
Ïa ka kyrteng jong kitei ki Doctor ymlah ban tip, namar kim pat trei bad ki la hap ban leit phai noh. U Samla Phersngi u la pynpaw ka jingsngewsih jur ïa ka jingleh meinah jong ka sorkar khlem da tip bad ïohi watla ki ophis sorkar ki long haduh katne ruh.
Kumta na ka liang ka seng ka dawa ban maramot mardor ïa katei ka ophis, khnang ba kan long ka jingmyntoi ïa u paitbah ba ri jingri hapoh ka thaiñ. U Samla Phersngi u la pynpaw bad buh jingkylli kaei ka daw ba katei ka Department ka jia haduh katne.
Hato ka sorkar ka don jingtip ne em ïa kane, ne dei ba ñiew beiñ tang na ka daw ba ka dei ha jaka ba kyndong. Ka Seng ka dawa na u minister jong ka tnad Animals & Husbandry Veterinary u Bah Sanbor Shullai, ba un leh ei ei halor kane ka mat ba kongsan.
