Nongstoiñ, Naitung 19: Ka FKJGP Lai Lyngdoh Area Unit ka la dawa ïa ka tnad PWD (R) ba kan tuklar lem halor ka jingsniew shaba palat pud jong ka surok naduh Kynroh Nongkynjang haduh Mawpun Rangblang kaba la pyntrei da ka kompani ba na Russia, kaba la buh jingeh shikatdei eh ïa ki paid nongshong shnong ka thaiñ.
Ka FKJGP Lai Lyngdoh Unit kala aiti da ka dorkhas sha u Executive Engineer ka PWD (R) ka Nongstoiñ Division, West Khasi Hills ba dawa ban tuklar mardor halor ka jinglong jingman jong kane ka surok, kaba pynïasoh ïa ka thaiñ bad ka sor Nongstoiñ.
Katkum ka dorkhas, ka seng ka la pyntip ba kane ka surok ba la pyntrei da ka kompani na Russia, ka la pynsohsat bha ïa ki paidbah ha ka leit ka wan namar ka jingsniew bad jingkylla ahor ktieh ha kane ka aiom slap. Ka ong ba kane baroh ka jïa namar kane ka kompani kam shym la shna pynbha ïa ka surok bad shu ieh lyngkrang ïa ka.
Ka FKJGP Lai Lyngdoh ka kyrpad ïa une u Executive Engineer ba un phah siang mawria ne pyndap da ki kynja khyndew lane maw ha shilynter kane ka surok, khnang ba kan ym pynjyrsieh ïa ka surok, kaba dei ka surok ba kongsan eh ba ju pyndonkam da ki paidbah ha ka leit iew leit hat, leit trei bad leit pyndep ïa ki kam ki jam khamtam ki khynnah skul.
Ka la ong ruh ba dei ban bthah ïa kane ka kompani ba kan siang maw noh ïa baroh ki subway kiba la shu shna tangdep, kiba la shna ban lied ïa ka jingkieng barim da ka jingthmu ban tei thymmai pat ïa ka.
Ka FKJGP ka la ujor ruh halor ka jingtih nongrim ban pynieng ïa ki païa jong ka jingkieng ba thymmai ïa kaba la kynnoh ba la shu leh torti bad I synjor bha, kaba buh pynban ha ka jingma ïa ka jingkieng. Ka la ong ba katei ka jingkieng kam dei satia kaba la trei skhem ha kaba wat ban ïaid ki kali rit ruh, ka la padai bad khynñiuh katno tam ban ïaid ki kali heh khamtam ki kali kiba kit palat pud.
Ka FKJGP ka la pyntip ba une u Engineer ula kular ba un sa tuklar bad khmih bniah ïa kane ka kam bad ba un sa bthah ruh ïa katei ka kompani ba kan trei janai ïa ka kam.
