Jot ka surok Jalyiah Bypass bad Khliehmyntriang-Narwan, byrngem ujor sha Ïingbishar

Shillong, Jylliew, 05: U Bah Lektor Dkhar, uba long u nongwad RTI na ka shnong Khliehmyntriang East Jaiñtia Hills District u la kynnoh ba ka jubab ha ka RTI ba la ïoh na ka ophis jong u Executive Engineer ka ophis PWD (Roads) Khliehriat Division kam ïahap satia bad ka jingsiang rong ïa ka surok Jalyiah Bypass hadien ba la mang pisa T. 3 klur ban maramot ïa kane ka surok.
Ha ka jingïakren bad ki lad pathai khubor ha ka sngi Palei u Bah Lektor u la ïathuh ruh kaba pynlyngngoh shuh shuh ka long ba ka surok kaba heh mynshwa 7 mitar hynrei mynta la pynrit sha ka 5.50 mitar bad nalor u la ong ruh ba ka jubab RTI ka la pynpaw ba ka jingrben ka rong ba la siang ïa ka surok ka long 20mm hynrei haba bishar ïa ka rukom siangrong ka paw ba ka jingrben ka long tang kumba 10 mm bad kumba ka long mynta kane ka surok ka la jot.
Katba ha kaba ïadei bad ka surok kaba pynïasoh naduh Khliehmyntriang shaduh ka shnong Narwan, u Bah Lektor u la buh jingkylli ruh shano ka pisa ka jah wat haba ladep ban mang pisa kumba 19 lak tam namarba ka ka jingmaramot ïa ka surok kam ïahap satia bad ka rukom mang ïa ka pisa.
Shuh shuh u Bah Lektor u la ong ba un sa ujor sha ka Ïingbishar High Court halor kane ka jingtrei torti ïa ka surok khnang ban pynïoh ïa ka hok jong ki paidbah.