Jowai, Lber 25: U ma Chanki Langbang ula ioh ia ka jingjop ban long u Dolloi ba pura jong ka Elaka Shangpung bad u ma Salong Lamare kum u Dolloi ba pura jong ka Elaka Nartiang ha ka elekshon jied Dalloi bala pynlong da ka Jaiñtia Hills Autonomous District Council (JHADC).
Ha ka jingñiew vote bala pynlong hynne ka sngi thohdieng ha MDC Hostel Riatsasim Jowai, u ma Chanki Langbang u la ïoh 5506 vote bad pynliem ia ki arngut ki kyrtong kiba kynthup ia u ma Daeiladmi Sungoh uba ioh 2720 vote bad u ma Harising Papang uba ioh 194 vote.
La ïoh jingkheiñ ba ka jingdon jong ki nongthep vote ha ka Elaka Shangpung ki don 10607. Kiba wan ban thep vote ki don 8640 kaba kot sha ka 81.46 % bad ki don 220 ki invalid vote. Kumba shu phai u Chanki Langbang u dei uba la long teng kum u Acting Dolloi ha ka Elaka Shangpung naduh ka snem 2016.
Haba phai sha ka Elaka Nartiang u ma Salong Lamare ula ïoh 3180 votes da kaba pynliem ïa ki lai ngut kiba ïakhun ïa kane ka kam Dolloi kiba kynthup ïa u ma Jomeo Dkhar uba la ïoh 2403 votes, u ma Leibanki Dkhar 141 votes bad u ma Helping Dhar 36 votes.
Ka jingdon jong ki Nongthep vote Dolloi baroh hapoh ka Elaka Nartiang ka kot sha ka 7196 hynrei na kine, kiba wan thep vote ki long 5946 kaba long 82.63 %, bad186 vote ki dei ki invalid ne ki bym treikam.
Kitei ki Dolloi haba kren sha ki lad pathai khubor, kila ai ka jingïaroh ïa ki paidbah ka kiba la ai ka jingkyrshan naduh ka mynsiem ban pynjop don burom ïa ki ha kane ka elekshon Dalloi.
Ha ka juh ka por kila kular ruh ban ai ka jingshakri kaba bha tam ïa ka Elaka khamtam ïa ki khun ka raïot ba kin nang kiew shaphrang ha baroh ki liang. Na ka liang EC jong ka JHADC kan sa aiti ïa ka Sanad ha kine ki khyndiat sngi ban wan.
