Shillong,Jymmang, 27: Kan long ka jingsarong ïa ka jaidbynriew Khasi, ia ka Jylla Meghalaya bad ia ka ri India baroh kawei bad khamtam eh ia ka All Meghalaya Traditional Wrestling & Pankration Association (AMTW& PA) hadien ba u heprit Bankhrawnam Ryndong uba dei u khynnah skul uba dang pule ia ka Class-8 ha Church of God Secondary School, Thangsning, East Khasi Hills District u la jop ia ka takma Rupa ha ka lympung ialehkai Asian Belt Wrestling Championship 2025 ba la pynlong da ka All India Traditional Wrestling and Pankration Federation ha ryngkat ka jingiatreilang bad ka World Alysh Federation & Asian Alysh Federation lem bad ka United World Wrestling.
Kum ban shu pyntip, kane ka lympung ialehkai kaba la long naduh ka 22 tarik haduh ka 26 tarik, Jymmang 2025 ha Talkatora Indoor Stadium, New Delhi.
Ki don kumba 10 tylli ki ri kiba iashim bynta ha kane ka jingiakop bad ka Kazakhstan ka la paw kum ka kynhun lahduh bud sa ka Kyrgyzstan kum ka kynhun ba wan baar bad ka Iran kum ka kynhun ba wan ba lai.
Hadien ba la wan phai na New Delhi ia u heprit Bankhrawnam Ryndong lem bad ka Lorenza Songthiang kynthup ruh ia u Bah Donny R Ranee la pdiang sngewbha da ki dhot jong ka All Meghlaya Traditional Wrestling &Pankration Association, ka Meghlaya School of Martial Arts bad ki nongmihkhmat na ka Church of God Secondary School, Thangsning.
U heprit Bankhrawnam Ryndong uba iakhun ha ka Under 17 Boy’s ha ka kyrdan 60 kilo u la shah pynliem noh ha ka jingiakhun phainal ha u rangialehkai jong ka ri Kazakhstan bad u la jop ia ka takma rupa.
Sa kawei pat ka khubor kaba sngewtynnat hangne ka long ba ka samla Lorenza Songthiang kaba la iohkhur ia ka takma rnong ha ka North East Games 2024 ha Nagaland bad 2 tylli ki takma Ksiar na ka AITW&PF CUP kaba la long dang shen ha Jaipur ka la shah jied ban iashim bynta kum ka qualified Asian Belt Wrestling Referee hadien ba ka la pass ia ka test ba la pynlong da ka United World Wrestling (UWW) bad ka la ioh ruh ia ka Diploma kum ka nongbishar ia kane ka jingialehkai ha dewbah Asia.
