Jop takma ksiar ka Marqueenless Ramsiej ha ka East Zone Junior National Athletics C’ship 2022

Shillong, Nailur 13 : Ka long ka burom bad ka jingsarong kaba khraw ïa ka jylla Meghalaya hi baroh kawei ha kaba ka Marqueenless Ramsiej ka la jop ïa ka takma ksiar ha ka sngi kut jong ka lympung ïalehkai 33rd East Zone Junior National Athletics championship 2022 na ka ïakop mareh 5000mts jong ka kyrdan U-20 ki kynthei.
Ka Marqueenless Ramsiej kadei ruh ka kynthei kaba nyngkong ban jop takma ksiar ha katei ka jingïakop mareh bad u Wolbetstar Ramsiej u la khur biang ïa ka takma rupa ha ka ïakop mareh 10000mts Boys U20, ka Anushka Majhong ka jop takma rnong ha ka Highjump jong ka kyrdan U16.
U Skhemlang Subba (800 & 1500mts) bad Donbok Shabong (400mt run) watla ki khlem jop takma pynban ki la lah ban ïalehkai bha ha katei ka lympung. Na ka liang ka association ka pynpaw ka jingsngewkmen bad ai khuble ïa ki nongïalehkai kiba la khur takma watla hapdeng ka jingbym lah ban kilan met ha ka rukom kaba janai pynban ki la lah shisha ban wanrah nam bad burom ka jylla hi baroh kawei. Ka la ai khublei ruh ïa ki coach, ïa ki nongtrei jong ka Directorate of Sorts and Youth Affairs hapoh ka jingïalam ka Kong WAM Booth kiba la ïarap na bynta ki nongïalehkai, ïa u Munin Changmai uba dei peit ïa ka SAI Centre Shillong bad kumjuh ruh ïa ki nongthoh khubor kiba la ïarap ban pathai ïa ka khubor na bynta ka jingtip ki paidbah.