Jowai, Risaw 31: Ki thei ïalehkai phutbol jong ka Ladthadlaboh ki la pynkhihwin ïa ka lympung 1st Women League Football Tournament 2025, da ka jingjop kaba shyrkhei, ha kaba ki la pynliem kput haduh 13-0 kol ïa ka Q.C.S Football Women Club ha ka jingïalehkai kaba la long hynne ka sngi Thohdieng (31 tarik Risaw), ha Kiang Nangbah Stadium, Dongmihsngi Jowai.
Kane ka jingïakhun ka la sakhi ruh ïa ka jingïalehkai kaba kyrpang na ka Daphimon Khyriem, kaba la thep marwei haduh 7 kol na ka bynta ka Ladthadlaboh. Tang ha ka kylla step ka Daphimon ka la ïoh thep ar tylli ki hat trik da kaba pynkhihjar ha ka minit kaba 3, 11, 18, 22, 29, 30 bad ka la bynrap ïa kaba hynñiew ha ka minit kaba 54.
Kumjuh ruh na ka liang jong ka Prema War kala ïoh hat trick da kaba pynkhihjar haka minit 7, 12 & 42, katba ka Risaka Phawa (23’), ka Diwali Dkhar (35’) bad ka Naki Kso (57’) ki la noh synñiang da kaba thep mar shi kol.
Ka omen League Football Tournament 2025, kadei ka lympung kaba nyngkong eh ba ka West Jaiñtia District Sports Association, (WJDSA) Jowai ka la pynlong na ka bynta ki kynthei jong ka thaiñ.
Ha kane ka juh ka sngi, ka jingïakhun ha ka kyrdan ‘Super Division Football Tournament – 2025’ ïa kaba la tip kum ka “17 U Kiang Nangbah Memorial Trophy” hapdeng ka Mooknor Thadmuthlong bad ka Nangbah Mulang ka la kut ha ka jingïakhaid da mar 2-2 kol.
Ka jingïakhun ka la long kaba itynnat, ha kaba ka Mooknor Thadmuthlong ka la wanphai nadien ban thep ar tylli ki kol ha ki minit pynjlan ba khatduh lyngba u Manhok Suchiang (90+1 & 90+3) ban pynïakhaid hadien ba u Shanhok Siangshai (31 & 59) u la thep ar tylli ki kol ban buh hakhmat ïa ka Nangbah Mulang.
