Shillong, Naiwieng 12 : Ki la don haduh 12 ngut ki rang bad ki thei ïakura ki ïoh khur ïa ka jingjop ha ka rynsan ïakura Mixed Martial Arts Maitshaphrang Fight Night ba la pynlong da ka Khasi Students Union, Laitumkhrah Unit ha ka 9 tarik Naiwieng, 2024 ha Basketball Court jong ka St. Anthony’s Higher Secondary School, Laitumkhrah Shillong.
Ka jingpynlong jong ka KSU ïa kane ka rynsan ïakura ka long ban pyllait ïa ki samla na u drok uba la jylllei haduh katta katta ha kane ka jylla.
Ha kane ka rynsan ïakura la sakhi lang da u MDC jong ka Malki Laitumkhrah Constituency u Bah Fantin J. Lakadong bad u General Secretary ka KSU Seng Kmie u samla Donald V. Thabah ki kongsan ba la shah khot kyrpang bad nalor kiwei kiwei pat kiba la shah khot sngewbha.
Ki rang ïakura kiba la ïoh khur ïa ka jingjop ha kane ka rynsan ïakura ki long u Batskhem Kharhunai, u Obadia Kelphung, u Adial Nongdhar, u Jeff Kynshi, u Shanlang Khongsit, u Shemphang Shabong, u Rishanskhem Lipon, u Synroplang Wahlang, u Pailaremdor Syiem bad u Melamkupar Marwein.
Katba ki kynthei kiba la jop ïa kane ka rynsan ïakura ki long ka Alfinia bad ka Careen.
