Jop ka Umchangyiar, Mookymphad Mihmyntdu, Riatsaliya Mihmyntdu bad Khliehmyntang Ialong ha ka WJDSA

Jowai, Nailur 09 : Ka jingïalehkai phubol bala pynïaid daka West Jaiñtia District Sports Association (WJDSA) kaba la long mynta ka sngi 9 tarik u Nailur haki ar tylli ki kyrdan kata ka ‘5th Adelbert Memorial Trophy 3rd Division Football 2025 bad ka ‘8th Debo Shullai Memorial Trophy 2nd Division Football 2025 bala pynlong ha madan Kiang Nangbah Stadium Dongmihsngi, Jowai.
Haba phai sha ka jingïakhun ba nyngkong haka kyrdan 3rd Division ka Umchangyiar SC kala pynliem da 1-0 kol ïaka Catholic Youth Mihmyntdu SC, ïa katei ka shikol naka Umchangyiar SC la kum thep bakla (own goal) da u Rajesh Dkhar haka minit ba 56.
Haka jingïakhun kaba ar ka Mookymphad Mihmyn-tdu SC kala pynliem da 3-1 kol ïaka Loompyrdi Iongpiah SC, ïa ki kol na ka Mookymphad Mihmyntdu la thep da u Lenis Sumer haka minit ba 21, u Firstborn Kyndait haka minit ba 53 bad u Trustme Chyrmang haka minit ba 57. Ïa ka shikol na ka Loompyrdi Iongpiah SC la thep da u Friday Najiar haka minit ba 11.
Katba haka jingïakhun kaba lai ka Riatsaliya Mihmyntdu kala pynliem da 7-1 kol ïaka Mookaswan Dongwah SC, ïa kitei ki kol na ka Riatsaliya Mihmyntdu la thep da u Neviki Phawa haka minit ba 9, u Marlangki Chyrmang haka minit ba 11, u Nedi Chyrmang lai kol haka minit ba 26, 29 & 35+1, u Ekune Chyrmang haka minit ba 49 bad u Bary Lyngdoh haka minit ba 60. Ïa ka shikol na ka Mookaswan Dongwah SC la thep da u Teimi o Ryngkhlem haka minit ba 71+1.
Haba phai pat sha ka jingïakhun jong ka 2nd Division ka Khliehmyntang Ialong kala pynliem da 2-0 kol ïa ka Luti Tuber Social Welfare. Ïa ki kol na ka Khliehmyntang Ialong la thep da u Bashan Pale haka minit ba 50 bad u Jaymz Bryan Pale haka minit ba 64.