Khliehriat, Nailur 23: Ar tylli ki kynhun ba kynthup ïa ka Suchen Mulieh bad ka Evergreen SC ki la khur jingjop ha ki jingïalehkai jong ka lympung phutbol kyrdan Third Division bala pynïaid da ka East Jaiñtia Hills District Football Association (EJHDFA) kiba la long ha kane ka Lah Sngi U Blei (23 tarik Nailur, 2024) ha madan EJDSA Artificial Turf, Diengshynrum, Khliehriat.
Haba phai sha ka jingïakhun ba nyngkong, ka kynhun ïalehkai jong ka Suchen Mulieh YWSC kala lah ban pynliem noh da 4-1 kol ïa ka Rymbai Sports YWO. Ha kane ka jingïalhekai u Hamedahun Lamurong u la ïoh ban pynkhihjar ar kol (2 & 46 minit) na bynta ka Suchen Mulieh YWSC, u Arki Suchen (33 minit) bad u Dominic Suchen (61 minit) ki la ïoh ban thep mar kawei. Katba ïa ka kol na ka Rymbai Sports la thep da u Solify Swer haka minit ba 12.
Ha ka jingïakhun kaba ar, la sakhi ïa ka Evergreen SC Lad Wahwapung kaba la jop salit da 1-0 kol ïa ka Tuber Shohshrieh SSC. Kane ka namtam na ka ka Evergreen SC la thep da u Dr. Sankey Shangpung (29 minit).
Katba ha ka jingïakhun kaba khadduh hapdeng ka Wahsarang SC bad ka Dkhiah West SC ka la poi sha ka jingïakhaid hadien ba baroh arliang kim shym la lah satia ban pynkhihjar.
