Saitsohpen-Sohra, ïaïong 13: Ka Sohra Cluster (A) bad ka Mawsynram Cluster ki la jop ïala ki jong ki jong ki jingïakhun ha ka lympung (L) Benjamin Diengdoh Memorial Under 16 Boys Inter School cum Cluster Cricket Tournament 2025, ba la long ha ka sngi Nyngkong.
ïa kane ka lympung la pynlong da ka East Khasi Hills Cricket Association [EKHCA] ha madan Pynshadkhurai Ground, Saitsohpen, Sohra, bad ka la jam mynta sha ka sngi ïakhun kaba san bad ki don saw tylli ki Cluster (shynrang) kiba ïashim bynta.
Baroh ar tylli ki kynhun ki la jop haba shimti ban tied nyngkong. Na ka liang jong ka Sohra Cluster (A) ka la jop suk da 79 ron ïa ka Pongtung Cluster, katba ka Mawsynram Cluster ka la pynliem salit da 14 ron ïa ka Sohra Cluster (B).
Hadien ba shah pyntied nyngkong ka Sohra Cluster (A) ka la lah ban kamai 129/6 haki 20 ober ha kaba u Omit Ray u la kamai 44 ron naki 39 bol, shuwa ba kan khanglad ïa ka Pongtung Cluster da tang 50/10 haki 15.2 ober. Nalor ba seisoh ha ka bowling u Omit Ray u la khur ruh 2/7 naki 2 ober ban ïoh ïa ka khusnam Player of The Match.
Ka jingïalehkai kaba bud la sakhi ïa ka Mawsynram Cluster kaba la jied ban tied nyngkong bad kamai 83/3 haki 12 ober, u Pynkhraw Jomati u la long uba kongsan ha ka tied da kaba kamai 24 ron naki 26 bol. U Spainlang Kharlukhi u la khur 1/5 haki 2 ober.
Watla u Guiding Sohkhlet u la noh synñiang 20 ron naki 16 bol hynrei ka Sohra Cluster (B) kam shym la lah ban poi sha ka thong, naba ka la kamai tang 69/6 haki 12 ober. U Pynkhraw Jomati u la khur 3/16 haki 3 ober kaba la biang ïa u ban ïoh ïa ka nam Player of The Match.
