Jowai, Jylliew 21: Ki ar tylli ki skul na nongbah Jowai kata ka North Liberty HSS kila long ki nongjop ha baroh ar tylli ki jingïakhun jong ka U-14 bad ka U-17, ha ka jingïakhun Inter School Football Tournament (Subroto Cup) bala pynïaid da ka ophis u District Sports Officer West Jaiñtia Hills District.
Nalor kiwei de ki skul kiba la ïoh nam jop mynta ka sngi kiba kynthup ïa ka H.K Sing Memorial Secondary School bad ka Padu Secondary School.
Ha ka jingïakhun ba nyngkong jong ka U-14 ka long hapdeng ka JNM SS Lamin pyrshah ïa ka North Liberty HSS, ha kaba ka North Liberty HSS kala jop ïa ka JNM SS da ka 3-0 kol.
Ka jingïakhun kaba ar ka long hapdeng ka R.C Eve’s Secondary School pyrshah ïa ka Govt. Boys H/S School, ha kaba ka R.C Eve’s Secondary School kala jop da 3-2 kol lyngba ka jingïashut tie breaker.
Ka jingïakhun kaba lai ka H.K. Singh Memorial Secondary School kala pynliem ïa ka Jaiñtia H/S School da 2-1 kol. Ka jingïakhun kaba saw ka Padu Secondary School kala pynliem ïa ka Marianhill H/S School da 3-0 kol. Ha ka jingïakhun U-17 ka Govt. Boys H/S School kala pynliem ïa ka Ummulong Presbyterian H/S School da 1-0 kol. Katba ka North Liberty H/S School kala pynliem ïa ka Kiang Nangbah H/S School da 3-0 kol. Katkum ka jingpyntip na ki bor pynïaid jong kane ka lympung la ïathuh ba lashai ka sngi kan ym don ka jingïalehkai namar ba ka dei ka sngi shuti.
