Jowai, K’lyngkot 04: Ka Shkenpyrsit SC bad ka Ryntihlang FC kila khur jingjop haka jingïalehkai “12th Secondary School Football Knock-out Tournament”, kaba la pynïaid daka Dorbar Shnong Pdengshakap hynnin ka sngi saitjaiñ.
Kane kala wan hadien baka Shkenpyrsit SC kala jop da 1-0 kol ïaka T.C Pdengshakap, ïaka shikol na ka Shkenpyrsit SC la ïoh ban thep da u Poibiang Pohshna haka minit kaba 28.
Haka jingïalehkai kaba ar pat ka Ryntihlang FC kala jop ïaka Ummudong SC da 4-3 lyngba ka jingïa shut Tie-breaker hadien bala kut ka jingïalehkai da 1-1. Ïaka shikol jong ka Ummudong SC la ïoh ban thep da u Everbright Sana haka minit kaba 21 bad ïaka Ryntihlang FC pat la thep da u Kyntu Nongwa haka minit kaba 22.
La pyntip ba yn bteng ïaka jingïalehkai haka 10 tarik mynta u bnai ha kaba ka Amlarem SC kan ïaleh pyrshah ïaka Ksu Thad Muthlong FC haka por 12 baje shiteng sngi katba ka Golden Lion FC (Rymbai) pyrshah ïaka YFC Trangblang haka por 2 baje nohphai sngi.
