Jop ka Shilliang Umshong ha ka Super Division ka EJHDFA mynta ka sngi
Shah pynhiar kyrdan ka Dhana CSC bad Ladrymbai-B SC
Jowai, Naiwieng 18: Ka jingïalehkai phutbol jong ka kyrdan Super Division Football Tournament-2025, kaba la tip kum ka 5th Kyrmen Shylla Contribution Trophy, ïa kaba la pynïaid daka East Jaiñtia Hills District Football Association (EJHDFA) kaba la long mynta ka sngi 18 tarik ha madan Artificial Turf, Diengshynrum, Khliehriat.
Ha ka jingïakhun kaba nyngkong ka Dhana CSC kala jop da 5-0 kol ïa ka Chiehruphi SYWSC, ïa kitei ki kol na ka Dhana CSC la thep da u Justmeki Swer haka minit ba 2, u Micheal Siangshai haka minit ba 33 & 80, u Pyntip Dkhar haka minit ba 39 bad u Marki Swer haka minit ba 73.
Katba haka jingïakhun ba ar ka Shilliang Umshong SC kala jop da 3-0 kol ïaka Ladrymbai-B SC, ïa kitei ki lai kol naka Shilliang Umshong la thep marwei (hattrick) da u Besterly Ksih haka minit ba 22, 59 & 72.
Da kane ka jingjop jong ka Shilliang Umshong SC kala rung sha ka Top Four da kaba ïoh khur haduh 13 point na ki 7 tylli ki jingïalehkai kata da kaba jop saw sien, ïakhaid shisien bad shah rem ar sien.
La pyntip ba ka kynhun jong ka Dhana CSC bad ka Ladrymbai-B SC ki dei ki team kiba shah pynhiar kyrdan ha ka aiom ïalehkai ban wan (next season), ka Dhana CSC kala ïoh tang 6 points na ki 7 tylli ki jingïalehkai, jop ar sein bad shah rem san sien. Ka Ladrymbai-B SC kala ïoh tang 2 points na ki 7 tylli ki jingïalehkai, ïakhaid ar sien bad shah rem san sien.