Jowai, Ïaïong 03: Ka lympung ïalehkai phutbol ba la tip kum ka ‘2nd U Adelbert Laloo Memorial Trophy’ jong ka kyrdan 3rd Division Football Tournament 2022 bala pynïaid da ka West Jaiñtia District Sports Association (WJDSA), ha ka sngi Saitjaiñ ha madan Kiang Nangbah Stadium, Jowai.
Ha ka jingïakhun ba nyngkong ba la wan ban aireng hapdeng ka Shangpung Khliehmuchut pyrshah ïa ka Riatsaliya Mihmyntdu, ha kaba ka kynhun ïalehkai jong ka Shangpung Khliehmuchut kala jop da 5-0 kol bad ïa katei ki kol la theh da u Eliser Suiam marwei haduh saw 4 kol kata ha ka minit ba 20,65,73 bad 80+2, u Bantei Iakai ula theh haka minit ba 53.
Ha ka jingïakhun ba ar pat kaba la long hapdeng ka Mawsiang FC Nongkhroh pyrshah ïa ka Nangbah Khloopano kala long kaba la theh shilling namar ka kynhun Mawsiang kala jop haduh 7-0 kol, ki nongthep kol ki kynthup ïa u Desiderius Pyrtuh ha ka minit ba 14 bad 52, u Ri-o Myrboh ha ka minit ba 18, 41 bad 46, u Pyndapbiang Myrboh ha ka minit ba 28 min bad u Sonowel Kharsati ha ka minit ba 68.
Katba ha ka jingïakhun kaba lai pat ka Iooksi Youth Welfare kala jop da 5-0 kol ïa ka Nangbah Mooknor bad ïa katei ki kol la thep da u Tympang Tangliang ha ka minit ba 14, 43 bad 62, u Pyrkhatbha Pasleiñ bad u Wympher Tangliang kila thep mar shikol kol ha ka minit ba 53 bad 57.
Ka jingïakhun ha ka sngi nyngkong jong ka 4 tarik kan long hapdeng ka Nonglatem pyrshah ïa ka Chyrmang Wah ha ka por 11 baje mynstep, ka Risingsun Mukhla pyrshah ïa ka Mynso Blazon ha ka por 1 baje nohphai sngi bad ka Madankynsaw Mookyndeng pyrshah ïa ka Newhills haka por 3 baje janmiet.
