Mawkyrwat, Naiwieng 08: Ka Golden Jubilee Celebration Football Tournament 2024 ba la pynïaid da ka Nonglang Sports Club ka la nang ïaid shaphrang ha kaba mynta ka sngi ka 08-11-2024 ka jingïalehkai ka la long hapdeng ka Ryntiehlang Football Club pyrshah ïa ka Sohkhyllam Sports Club ha Madan Pyndenïewlyngdoh, Nonglang, South West Khasi Hills District.
Haba phai ha ka jingïalehkai, ka la long ka jingïaleh kaba itynnad bha namar naduh ba sdang haduh ban da kut ka regular time kaba dei 90 minit baroh ar kynhuh ki la ïakhun kat lah kat ïai ban pynpoi ïa la ka jong ka kynhun sha ka thong jong ka jingjop.
Namarkata, ha ka kyllastep la sakhi ba ym shym la don mano mano ba ïa pynkhih jar watla la bun tylli ki khep ki ‘rangïalehkai ki la ïa pyrshang thep kol hynrei ki la shu leh noh ei bad ka la shu kut noh ha ka jingïakhaid mar 0.
Haba wan phai sha ka kyllamiet ka Ryntiehlang FC lyngba u Teibor Wahlang ha ka minit ba 71 ka la ïoh ban pynkhih ïa ka jar watla ka jingkhlaiñ jong ka Sohkhyllam SC kaba la pyrshang bun tylli ki kabu hynrei kam lah ban thep kol bad haduh bakut ka kyllamiet bad ha kaba kut ka Ryntiehlang FC ka la jop noh tang da 1 – 0 kol pyrshah ïa ka Sohkhyllam SC.
Ïa ka nam nongïalehkai ba tbit tam mynta ka sngi la rah da u Teibor Wahlang jong ka Ryntiehlang FC ha kaba la sam da u Rishotroy Kharjahrin. Ka jingïalehkai kaba bud kan long ha ka 12-11-2024 hapdeng ka Evergreen S&CC Nongjri pyrshah ïa ka Spirit Warrior FC ha ka por 2 baje nohphai sngi.
