Jowai, Naitung 06: Ka jingïalehkai phutbol ‘5th Debo Shullai Memorial Trophy’ 2nd Division Football League Cum Knockout Tournament-2022 bala pynïaid da ka West Jaiñtia District Sports Association (WJDSA) kaba la long mynta ka sngi ha madan Kiang Nangbah Stadium Jowai.
Haba phai sha ka jingïakhun hapdeng ka West Madan Mustem pyrshah ïa ka Pynthorlangteiñ, katba naka liang ka kynhun ïalehkai jong ka Pynthorlangteiñ kala jop da 2-1 kol. Ïa kitei ki kol na ka Pynthorlangteiñ la thep da u Balongshwa Surong ha ka minit ba 8 bad u Wanbiang Bang ha ka minit ba 74. Katba ïa ka shikol na ka West Madan Mustem la thep da u Luckystar Shylla ha ka minit ba 53 min.
Lashai ka sngi 7 tarik ka jingïakhun kan long hapdeng ka Lumpariat pyrshah ïa ka Dongmihsngi ha ka por 3 baje nongphai sngi.
