Jop ka One Soul Utd bad ka Rymbai Shkenshynriah SC, yn bteng biang ka jingïakhun haka 24 tarik

Jowai, K’Lyngkot 19: Ka One Soul Utd (Pdengkarong) bad ka Rymbai Shkenshynriah SC kila khur jingjop haka jingïalehkai ”12th Secondary School Football Knock-out Tournament”, kaba la pynïaid daka Dorbar Shnong Pdengshakap.
Kane kala wan hadien baka One Soul Utd (Pdengkarong) kala jop ïaka Demthring SC da 2-0, ïaki arkol jong ka One Soul Utd (Pdengkarong) la ïoh ban thep da u Marshial Nongrum haka minit kaba 42 bad u Mario Surong haka minit kaba 44.
Haka jingïalehkai kaba ar pat ka Rymbai Shkenshynriah SC kala lah ban pynliem noh ïaka Chirupdeilang FC da 2-1, ïaki kol jong ka Rymbai Shkenshynriah SC la ïoh ban thep da u Niwano Bareh haka minit kaba 11 bad u Sarious Bareh haka minit kaba 29. Katba ïaka shikol jong ka Chirupdeilang FC la ïoh ban thep da u Saimi Dkhar haka minit kaba 9.
La pyntip ba ka jingïakhun yn bteng haka 24 tarik mynta u bnai ha kaba ka Kur Suchen United FC kan ïaleh pyrshah ïaka Kemidon FC haka por 12 baje katba ka Sengkhihlang FC pyrshah ïaka Siangkhnai FC haka por 2 baje nohphai sngi.