Shillong, Rymphang 16: Watla ka Nongthymmai SC ka la shah lamkhmat ar sien ha ka jingïakhun hynrei ka la pynkut noh da ka jingjop da 3-2 kol pyrshah ïa ka Sawmer SC ha ka jingïakhun kaba itynnad bha ha ka OC Blue Shillong Premier League 2024 ha madan First Ground – SSA Stadium, Polo, ha ka sngi Saitjaiñ. Shuwa kane, ka Rangdajied United FC ka la lah ban pynliem ïa ka Langsning FC da 3-1 kol ban khur pura ïa ki lai point.
Ha ka jingïakhun, ka Sawmer ka la ïoh ban lamkhmat ar sien lyngba ka kol na u Diego Khyriem (9’minit) bad u Shanmeiaki Warlarpih (25’minit) hynrei ka Nongthymmai ka la ïakhun shitom ban pynphai lyngba u Rudolf Shadap (14’minit), Iohborlang Mukhim (38’ minit) shuwa ba u Donboklang Majaw (65’P) un pynkhih ïa ka kol pynjop. Ha kawei pat ka jingïalehkai, hadien ba ym shym la don ba lah pynkhihjar ha ka kylla step, ka Rangdajied ka la thep ïa ki lai tylli ki kol lyngba u Arlangky Nongsiej (54’, 87’P minit) bad u Benny Khriam (59’minit), katba ka shi kol na ka Langsning la thep da u Roikhihbha Nongtdu (61’minit).
Kane ka dei ka namjop kaba 10 ïa ka RUFC ha kane ka samoi bad ka la kynkiew ïa ka sha ka kyrdan ba ar da kaba kamai 32 poiñ. Hynrei, kiwei pat ki kynhun ba don ha ka thup Top 3 – ba kynthup ïa ka Mawlai SC (kaba bat kyrdan ba hakhlieh duh) bad ka Shillong Lajong FC (kaba wan kyrdan ba lai) – baroh ar ki dang sah sa ar tylli ki jingïalehkai ha kti. Ka Mawlai ruh ka la kamai 32 poiñ, bad ka don ïa ka rekod kaba kham bha ha ki jingïalehkai ba ki ïakynduh pyrshah (head-to-head) bad kumta ka bat ïa ka kyrdan ba nyngkong, hakhmat ka Rangdajied. Ka Langsning ka dang ïaineh ha ka kyrdan ba saw.
Haba phai sha ka Sawmer, ka jingjop ha katei ka sngi kan jin da la rah ïa ka sha ka kyrdan ba saw hynrei ha ka jaka kata ka dang sah ha ka kyrdan ba hynñiew bad ka jingbat jong ki ïa kane ka kyrdan kan nym long kaba skhem namar ba ki la ïalehkai kham bun ki jingïalehkai ban ïa ki klob kiba don hapoh.
Ka Nongthymmai ka dang ïaineh ha ka thup shah pynhiar kyrdan (relegation zone) hynrei mynta ka la kynjoh ïa ka phew ha kaba ïadei bad ka point, da kaba ïoh 11 point, kaba ai jingkyrmen ïa ki ba ki dang lah ban kiar ïalade na ka thup ki kynhun ban shah pynhiar.
Mynta ka sngi nyngkong kin don ar tylli ki jingïalehkai, ha kaba ka Ryntih FC kan aireng pyrshah ïa ka Shillong Lajong ha ka por 11 baje mynstep bud sa ka jingïalehkai hapdeng ka Nongrim Hills SC bad ka Mawlai ha ka por 2 shiteng mynsngi.
