Shillong, Jymmang 12: Ka Nongrim Hills SC kala pynliem da 3-1 kol ïa ka Smit ha ka lympung ïalehkai First Division ka SSA ha ka jingïalehkai ha ka sngi Palei.
Ka Nongrim Hills mar ïa sdang ka jingïalehkai kaba dang ïaid ar minit kala ïoh shi kol ba la thep da u Bankit Nongrum shwa ba u Phibankhraw Nongkhlaw un thep ïa ka kol kaba ar ha ka minit ba 23.
Ha ka jingïalehkai jong ka kylla miet, ki rangïalehkai ka Smit SC kila ïakhun tyngeh bad ha ka minit ba 61 u Shankupar Kharbyngar u la thep shi kol kaba la ai mynsiem ïa ka kynhun.
Ki rangïalehkai ka Nongrim Hills SC ruh kila nang ïakhun tyngeh bad ha ka minit ba 73 u Banshemphang Kurbah u la thep ïa ka kol kaba lai kaba pynlong ïa ka kynhun ban khur jingjop syndon da 3-1.
