Jop ka Newhills bad Pamanik ha ka lympung 3rd Division ka WJDSA

Jowai, Lber 28: Ka jingïalehkai phutbol mynta ka sngi ba la pynïaid da ka West Jaiñtia District Sports Association (WJDSA) kaba la tip kum ka ‘2nd U Adelbert Laloo Memorial Trophy’ jong ka kyrdan 3rd Division Football Tournament 2022 ba la pynlong ha madan Kiang Nangbha Stadium Jowai.
Na ka liang ka kynhun jong ka Newhills bad ka Pamanik kila long kum ki nong jop, katba ka kynhun jong ka Mynso Blazon bad ka Mookaswan Dongneiñ kila ïakhait ha ka jingïalehkai da 0-0 kol.
Haba phai sha ka jingïakhun hapdeng ka Newhills pyrshah ia ka Catholic Youth Mihmyntdu, na la liang ka kynhun jong ka Newhills kala lah ban pynliem ïa ka Catholic Youth da 2-0 kol, Ïa kitei ki kol na ka Newhills la thep da u Iakiru Dkhar ha ka minit ba 10 bad u Aiborlang Sumer ula thep ha ka minit ba 75.
Ka jingïakhun kaba la long hapdeng ka Mulang Ialong pyrshah ïa ka Pamanik ha ka por 3 baje nohphai sngi ka Pamanik ka la jop da 4-1 kol, ïa kitei ki kol na ka Pamanik la thep da u Benedict Langstang ha ka minit ba 10, u Dawan Pakma ha ka minit ba 23 bad u Dame Talang ar kol ha ka minit ba 36 bad 70. Katba na ka liang ka Mulang Ialong la theh ïa ka shi kol lyngba u Waibha Shylla ha ka minit ba 64.
Ka jingïakhun lashai ka sngi 30 tarik kan long hapdeng ka Ksehsylle Ialong pyrshah ïa ka Khliehmyntdu Neinchnong ha ka por 11 baje mynstep, ka Lumchyrmang Mihmyntdu pyrshah ïa ka Saiñdur Mihmyntdu ha ka por 1 baje nohphai sngi bad ka Moodymmai pyrshah ïa ka Iong I dahi FC haka por 3 baje janmiet.