Jowai, Naitung 27: Ka jingïalehkai phutbol ‘5th Debo Shullai Memorial Trophy’ 2nd Division Football League Cum Knockout Tournament-2022 bala pynïaid da ka West Jaiñtia District Sports Association (WJDSA) kaba la long mynta ka sngi ha madan Kiang Nangbah Stadium Jowai.
Haba phai sha ka jingïakhun kaba la long hapdeng ka Mookyndur pyrshah ïa ka Mynsngat, na ka liang ka kynhun ïalehkai jong ka Mookyndur kala jop da 4-0 kol. Ïa kine ki saw kol la thep da u Nehlang Phawa haka minit ba 42, u Jomsing Pariat haka minit ba 52, u Arwanki Phawa haka minit ba 61 bad u Gideon Pariat haka minit ba 68.
Katba na ka liang ka Mynsngat kala pyrshang la ka buit ka bor ban thep kol, hynrei da ka jingtbit palat ki rangïalehkai jong ka Mookyndur la lah ban khadlad ïa ka Mynsngat ban ïoh pynphai wat tang shikol ruh.
