SHILLONG, Naiwieng 01: Ka Mawtawar ka la ïoh ban khur ïa ka jingjop ha ka jingïalehkai ka lympung First Division Football League 2024 jong ka Shillong Sports Association ba la long ha ka 01 tarik Naiwieng (sngi Thohdieng), ha SSA Stadium-Polo. Ha kane ka sngi ka Mawtawar SC ka la pynliem noh da 3-2 kol ïa ka Umphyrnai SC ban khur ïa ki lai point ba kongsan.
Ka jingïalehkai ka la long kaba itynnat naba baroh arliang mamla ki la ïoh markylliang ban pynkhihjar. Ka Mawtawar SC ka la pynkhih ïa ka kol kaba nyngkong lyngba u Meban Kurkalang (4’) shuwa ba u Rishan Mylliem Umlong un thep ïa ka kol kaba ar (30min’).
Hynrei tang hadien saw minit u Isharwell Mukhim (34min’) u la ai mynsiem ïa ka Umphyrnai da kaba pynphai shi kol, bad ban shah lamkhmat da tang 2-1 haba kut ka kylla step. Ka kynhun ka la wanphai da kaba tyngeh ha ka kylla miet bad pynïakhaid ruh mar 2-2 kol lyngba u Easter S CH Sangma (76min’).
Kaba sngewsih ïa ka Umphyrnai watla ka la lah ban pynïakhaid ka la shah thep biang pat ha ki 9 minit ba khadduh shuwa ban kut, ha kaba u Fedrick Lyngdoh (81min’) u la thep ïa ka namtam ban wanrah namjop ïa ka Mawtawar.
Ka jingïalehkai SSA 1st DIVISION Football League 2024 ha kane ka sngi Saitjaiñ (02 tarik Naiwieng, 2024) kan long ha ka por 5 baje janmiet, ha SSA Stadium, ha kaba ka Sohryngkham SC kan aireng pyrshah ïa ka Nongkseh SC.
