Shillong, Nailur 24: Ka jingïalehkai jong ka lympung SSA U-20 4th DIVISION Football League 2023 kaba la pynlong ha 3rd Ground MFA hynne ka Sngi Thohdieng hapdeng ka Lamlynti SC pyrshah ïa ka Mawpdang SC, ka la jam sha kaba kut ha kaba ka kynhun jong ka Mawpdang SC ka la khur ïa ka namjop salit da 2-1 kol.
Haba phai sha kane ka jingïalehkai, dei ka Lamlynti kaba la ïoh ban plie pyrda ban pynkhihjar lyngba ka kol na u Ksankupar Khongngaiñ ha ka minit kaba 12.
Hynrei na ka liang jong ka Mawpdang kam shym la duh mynsiem bad ïakhun tyngeh ban ïoh pynphai ïa katei ka shi kol, bad dei ynda la jam sha ka 38 minit ba u Garywell Syiem u la ïoh ban pynïakhaid.
Hadien katto katne por u Hamekordor Mylliem u la ïoh ban thep sa ïa ka kol kaba ar ha ka minit ba 60 na bynta ka kynhun (Mawpdang SC) kaba la pynïoh ban khur ïa ka namjop.
Mynta ka sngi kin haduh hynriew tylli ki jingïakhun ka ban sdang naduh ka por 10 baje mynstep, Ka Laitumkhrah SC pyrshah ïa ka Madanrting SC, Mawlyngngad SC pyrshah ïa ka Mawnianglah Youth SC, Laitlulong SC pyrshah ïa ka Lamlynti SC (Sohïong), Diliengiem YSCWA pyrshah ïa ka Iatyllilang SC, ka Pomura SC pyrshah ïa ka Laitkroh SC bad ka jingïalehkai kaba khadduh ka long hapdeng ka Lummawbah SC pyrshah ïa ka Umsohsun SC.
