Shillong, Nailur 14: Malki SC ka la pynlyngngoh biang ïa ki paidbah ha ka OC Blue Shillong Premier League 2021-22 ha Third Ground, Polo mynta ka sngi. Ka Malki SC ka la pynliem ïa ka Nangkiew Irat da 3 kol ka 1, hadien ba ka la shah thep nyngkong ha ka Nangkiew.
U Damehun Syih ka Nangkiew Irat, u la thep nyngkong ha ka minit kaba 17 jong ka jingïalehkai. Hyntrei hadien kane ka Malki, ka la khyrwit tyngeh bad sei ka buit ka bor khlem da aili shuh ïa ka Nangkiew ban thep kol. Tang shi minit hadien ba ka Nangkiew kala pynkhih jar, ka Malki ka la ïoh ban pynïakhaid lyngba u Emboklang Nongkhlaw ha ka miinit ba 18. Nangta u Sanborlang Marweiñ u la ioh thep ïa ka kol ba ar ha ka minit ba 37 bad u Marchsterfield Marbaniang u la thep ia ka kol kaba lai ha ka miinit kaba 73. Ka Mali ka don ha ka kyrdan ba 7 bad ka Nangkiew Irat ha ka kyrdan ba 5. Ka Mawlai kaba la ïoh 32 Point bad tam 10 Point ïa ki team ba wan ba ar, kata ka Langsning bad ka Rangdajied United ka la thikna ban rah ï a ka thong, namar ba ki jingïalehkai ki sah satang ar tylli bad kiwei pat sa 1.
