Jowai, Nailar 28: Ka jingïalehkai phubol bala pynïaid da ka West Jaiñtia District Sports Association (WJDSA) kaba la long hynne ka sngi 28 tarik u Nailar haki ar tylli ki kyrdan kata ka ‘5th Adelbert Memorial Trophy 3rd Division Football 2025 bad ka ‘8th Debo Shullai Memorial Trophy 2nd Division Football 2025 bala pynlong ha madan Kiang Nangbah Stadium Dongmihsngi, Jowai.
Haba phai sha ka jingïakhun ba nyngkong haka kyrdan 3rd Division ka Lumkhangdong Kyndongtuber kala pynliem da 1-0 kol ïa ka Mookaswan Dongwah, ïa katei ka shikol na ka Lumkhangdong Kyndongtuber la thep da u Fourki Shyrmang haka minit ba 54.
Haka jingïakhun kaba ar ka hapdeng ka Myrjai bad ka Da-i-hi Mynsngat kila poi sha ka jingïakhaid da mar 2-2 kol, ïa ki kol na ka Myrjai la thep da u Treilang Kyndait haka minit ba 10 & 65 bad ïa ki kol naka Da-i-hi Mynsngat la thep da u Marjan Shylla haka minit ba 40 bad u Richard Mukhim haka minit ba 67.
Katba haka jingïakhun kaba lai ka Pateinki Sabahmuswang kala pynliem da 1-0 kol ïa ka Sohmynting Dongneiñ, ïa katei ka shikol na ka Pateinki Sabahmuswang la thep da u Wanriky Lyngdoh haka minit ba 40.
Haba phai sha ka jingïakhun jong ka 2nd Division ka kynhun jong ka Loomsoiung Newhill kala pynliem da 4-0 kol ïa ka Panaliar. Ïa kitei ki kol na ka Loomsoiung Newhill la thep marwei da u Kyrkhudametre Ryngkhlem haka minit ba 17, 49, 63 & 77.
